داخلا نمبر 4634
عنوان ڀائو در محمد ، ٻرڙو
شاخ شخصيتون
پڙهيو ويو 398 ڀيرا
داخلا جو حوالو انسائيڪلوپيڊيا سنڌيانا جلد ٻيو

ڀائو در محمد ، ٻرڙو

”ڀائو“ در محمد، ٻرڙو: ’ڀائو‘ جي لقب سان سڃاڻپ رکندڙ دُر محمد ولد خير محمد ٻرڙو، 11 جنوري 1956ع تي قمبر ۾ ڄائو. هن شروعاتي تعليم قمبر مان حاصل ڪئي، سندس تعليم، سنڌي اديب ۽ انٽر آرٽس آهي. 1975ع کان قمبر ۾ قائم ڪيل مختلف ادبي، سماجي ۽ سياسي تنظيمن جو باني رهيو آهي. جن ۾ گلن جهڙا ٻارڙا سنگت، سجاڳ ٻار تحريڪ، سنڌي شاگرد تحريڪ، سنڌي مزدور تحريڪ، ڊسٽرڪٽ هسٽاريڪل سوسائٽي قمبر، ڊاڪٽر محبت اڪيڊمي، ڀائو در محمد ٽرسٽ ۽ سنڌي ادبي سنگت، شاخ قمبر شامل آهن. 2005ع ۾ قمبر ۾”ڀائو در محمد ٻرڙو پبلڪ لائبريري“ قائم ڪيائين. 2007ع ۾ محترمه بينظير ڀٽو جي شهادت واري واقعي بعد پيدا ٿيل ردِ عمل ۾ بي سمجهه ماڻهن ڪيترين سرڪاري عمارتن، بئنڪن سان گڏ هن لائبريريءَ کي به ساڙي ڇڏيو. هن واقعي ۾ لائبرريءَ کي پهتل نقصان تي ڪيترن ساڃهه وندن آواز اٿاريو. قمبر ۾ سماجي ڪمن جي حوالي سان ڀائو در محمد ٻرڙو ڪيترين ئي تنظيمن جو ميمبر ۽ عهديدار رهيو آهي. ”گل ڦل ٻارڙا سنگت“جو چيئرمين ۽ سنڌي ادبي سنگت ضلعي قمبر-شهدادڪوٽ جو ضلعي رابطه سيڪريٽري ۽ شهري اتحاد قمبر جو صدر رهي چڪو آهي.”ساٿ هلندو رهي“ نالي هڪ ڪتاب 2009ع ۾ ڇپائي پڌرو ڪيائين. جنهن ۾ سڙي ويل لائبرريءَ بابت تاثر ۽ ڪيس اسٽڊي آهي، هن اها لائبرري نئين سِر تعمير ڪرائي آهي. در محمد ٻرڙي سياسي ۽ سماجي ماڻهن سان گڏجي نئين ضلعي هاڻي ”قمبر شهدادڪوٽ ايٽ قمبر“ قائم ڪرائڻ واري تحريڪ ۾ اڳواڻيءَ وارو ڪردار ادا ڪيو، ’قمبر ضلعو بچايو‘ تحريڪ جو سيڪريٽري رهيو. سندس مستقل رهائش قمبر ۾ آهي.


هن صفحي کي شيئر ڪريو

داخلا ۾ استعمال ٿيل تاريخون

11.01.1956  عيسوي

دُر محمد ٻرڙو ، 11 جنوري 1956ع تي قمبر ۾ ڄائو



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون