داخلا جي تاريخ 2012-08-03
داخلا نمبر 4202
عنوان آرسي (رسالو)
شاخ رسالا
پڙهيو ويو 406 ڀيرا
داخلا جو حوالو انسائيڪلوپيڊيا سنڌيانا پهرين جلد لاءِ ضميمو (پنجون جلد)

هن داخلا جون تصويرون موجود ناهن

آرسي (رسالو)

آرسي (ڪتاب ):هيءُ ڪتابي سلسلو سنڌي ادب جي ناميارين اديبن ۽ عالمن پروفيسر ظفر حسن ۽ ولي رام ولڀ پاران 1983 ع کان جاري ڪيو ويو هو، جنهن جو پورو نالو ’سهيوڳي ساهت ۽ جلا جي آرسي‘ هو. هن ڪتابي سلسلي ۾ نون توڙي پراڻن اديبن جون ڪهاڻيون، شاعري، انٽرويو، سفرناما، ڪالم، آتم ڪهاڻيون، ليکڪن جا تعارف، انعام يافته ڪتابن جا وچور ۽ ان دور ۾ ڇپجندڙ ادب جي اڀياس تي مشتمل مواد شايع ڪيو ويندو هو. هن ڪتابي سلسلي جا چار کان وڌيڪ شمارا نڪتا، جن ۾ اعليٰ درجي جو ادبي علمي مواد ڇاپيو ويو. هن ڪتابي سلسلي سنڌ اندرشعوري ترقيءَ کي هٿي وٺرائڻ سميت نون لکندڙن لاءِ نوان موضوع نمايان ڪيا. رسالي ۾ شايع ٿيندڙ مواد معيار جي لحاظ کان پنهنجو مٽ پاڻ هو. هن ڪتابي سلسلي جي پهرين ڪڙيءَ ۾ ’شروعات‘ جي سري سان ظفر حسن ۽ ولي رام ولڀ لکن ٿا ته: اسان اظهار جي محدود دائرن کي ڪشادو ڪرڻ جي ڪوشش ڪئي آهي. جيئن ’آرسي‘ جي هن فورم تي سڄاڻ ذهنن جي تخليقن کي سگهه سان پيش ڪري سگھجي . اسان انهن تخليقي صلاحيتن جا ڳولهائو آهيون، جيڪي لاڙن، سوچن، جديد فارمن ۽ ٽيڪنيڪن جا ڏس ڏين ٿيون. هن ڪتابي سلسلي جي پهرين ڪڙي 1983ع ۾ ڇپي جنهن ۾ 300 صفحا هئا، ٻي ڪڙي 300 صفحا ۽ ٽين ۽ چوٿين ڪڙي 303 صفحن تي 1985ع ڌاري آرسي پبليڪيشن حيدرآباد پاران ڇپجي پڌريون ٿيون. هر ڪڙيءَ جي قيمت 25 روپيا هئي.


هن صفحي کي شيئر ڪريو