داخلا نمبر 1313
عنوان اصغر خان
شاخ سياستدان
پڙهيو ويو 508 ڀيرا
داخلا جو حوالو
اصغر خان

اصغر خان

اصغر خان

اصغر خان: ريٽائرڊ ايئر مارشل اصغر خان سياستدان ۽ پاڪ فضائيه جو سربراهه رهيو آهي. سندس سڃاڻپ هڪ ايماندار سياستدان واري آهي. هو ڊگهي عرصي تائين جي. آءِ. اي جو پڻ سربراهه رهيو هو. اڌ درجن کن ڪتابن جو ليکڪ آهي.
اصغر خان 17 جنوري 1921ع تي ڄمون (ڪشمير) ۾ ڄائو هو ۽ پختون خاندان سان تعلق رکندڙ برگيڊيئر ٺاڪر رحمت الله خان بهادر جو پٽ آهي. سندس والد پهرين مهاڀاري لڙائيءَ دوران جنگ ۾ قيدي رهيو ۽ ٻي مهاڀاري لڙائيءَ ۾ به حصو ورتو هئائين. اصغر خان ديرا دون جي رائل انڊين آرميءَ ۾ ڪميشن حاصل ڪئي. 1944ع ۾ هن برما ۾ جپانين خلاف فضائي آپريشن ۾ حصو ورتو. بعد ۾ سندس خاندان ڪشمير مان لڏي اچي ايبٽ آباد ۾ آباد ٿيو. اصغر خان بنيادي طرح بري فوج جو آفيسر هو. جڏهن جنگ لڳي ته ڪيترن فوجي آفيسرن کي انڊين ايئر فورس ڏانهن بدلي ڪيو ويو، انهن ۾ اصغر خان به شامل هو. پاڪستان ٺهڻ کانپوءِ هو رائل پاڪستان ايئرفورس ڪاليج رسالپور جو پهريون ڪمانڊر ٿيو. اصغر خان 36 سالن جي ڄمار ۾ ايئر چيف مقرر ٿيو ۽ ان عهدي تي 8 سالن (65-1957ع) تائين رهيو.
سياسي ڪيريئر: 1971ع کان 77ع تائين ذوالفقار علي ڀٽو حڪومت جي مخالف طور هن اهم ڪردار ادا ڪيو. ڇاڪاڻ جو اهي ٻئي اڳواڻ ذاتي طرح سان هڪ ٻئي سان ٺهندا ڪو نه هئا. 1977ع ۾ جڏهن پاڪستان قومي اتحاد (پي اين اي) ڀٽي صاحب خلاف تحريڪ هلائي ته سندس پارٽي ان اتحاد ۾ شامل هئي. 77ع وارين چونڊن ۾ اصغر خان ڪراچي ۽ ايبٽ آباد، ٻن هنڌن تان قومي اسيمبلي جون سيٽون کٽيون. 1979ع ۾ ڀٽي صاحب جي حڪومت کي برطرف ڪرڻ بعد جڏهن ضياءُ الحق عام چونڊن جو اعلان ڪيو ته ملڪ جا ڪيترائي ناميارا سياستدان سندس پارٽيءَ ۾ شامل ٿي ويا. ضياءُ الحق جڏهن چونڊون ملتوي ڪيون ته اصغر خان گهر ۾ نظربند هو ۽ هو پنجن سالن تائين نظربند رهيو.
1983ع ۾ جڏهن ضياءُ الحق خلاف سمورين پارٽين جو اتحاد آر ڊي'>ايم آر ڊي ٺهيو ته سندس پارٽي تحريڪ استقلال به ان اتحاد ۾ شامل ٿي. 1986ع ۾ جڏهن اصغر خان آر ڊي'>ايم آر ڊي کان ڌار ٿيو ته سندس پارٽي جي ڪيترن اڳواڻن احتجاج طور پارٽيءَ تان استعيفيٰ ڏيئي ڇڏي. اصغر خان 85ع جي چونڊن جو بائيڪاٽُ ڪيو پر 88ع جي چونڊن ۾ حصو ورتو پر هو ڪا به سيٽ کٽي نه سگهيو. 90ع ۾ لاهور مان چونڊن ۾ شڪست بعد هن سياست تان ريٽائر ٿيڻ جو اعلان ڪيو. سندس پٽ عمر اصغر خان جنرل پرويز مشرف جي حڪومت ۾ وفاقي وزير رهيو. ڪابينا مان استعيفيٰ ڏيڻ بعد 2002ع جي چونڊن ۾ حصي وٺڻ لاءِ هن پارٽيءَ جي اڳواڻي سنڀالي ۽ پارٽيءَ جو نالو تبديل ڪري قومي جمهوري پارٽي رکيو.عمر اصغر خان جو پراسرار حالت ۾ موت واقع ٿيو.


هن صفحي کي شيئر ڪريو

داخلا ۾ استعمال ٿيل تاريخون

1921.01.17  عيسوي

اصغر خان 17 جنوري 1921ع تي ڄمون (ڪشمير) ۾ ڄائو



سياستدان - ڀاڱي جون ٻِيون داخلائون

بجاراڻي هزار خان
بچاڻي شمشاد بيگم
اسد سڪندر ملڪ
اسد عابد قاضي
اسفند يار ولي
اسماعيل راهو
اصغر خان
اعجاز جکراڻي
اعجاز علي خان ٽالپر
اعجاز علي خان جتوئي
سياستدان ڀاڱي جا وڌيڪ مضمون