داخلا نمبر 2184
عنوان امين لغاري
شاخ شخصيتون
پڙهيو ويو 357 ڀيرا
داخلا جو حوالو انسائيڪلوپيڊيا سنڌيانا جلد پهريون
امين لغاري

امين لغاري

امين لغاري

امين لغاري: امين محمد عرف غلام حيدر ولد ولي محمد لغاري، 7 جون 1966ع تي ڳوٺ جعفر خان لغاري، تعلقي سنجهوري، ضلعي سانگهڙ ۾ جنم ورتو. پرائمري تعليم پنهنجي ڳوٺ مان حاصل ڪرڻ کان پوءِ مئٽرڪ، گورنمينٽ هاءِ اسڪول سانگهڙ مان ڪيائين. 1984ع ۾ گورنمينٽ ڊگري ڪاليج سانگهڙ مان بي. اي ۽ 1991ع ۾ سنڌ يونيورسٽي ڄامشوري مان، ماس ڪميونيڪيشن ڊپارٽمينٽ مان ايم. اي ڪيائين. ان شعبي ۾ پڙهائيءَ دؤران، يونيورسٽيءَ طرفان نڪرندڙ مئگزين، ”يوني مئگ“ جي اردو حصي جو اسسٽنٽ ايڊيٽر رهيو. پڙهائيءَ دوران ’ماس ڪميونيڪيشن سوسائٽيءَ‘ جو صدر رهيو ۽ انهيءَ پليٽ فارم تان يونيسيف جي سهڪار سان ’سنڌ نيٽ ورڪ فار چلڊرين‘ (سڄڻ) نالي تنظيم جو پايو وڌو ويو ۽ امين لغاري ان تنظيم جي بانيڪارن مان هو. ان کان سواءِ هي سنڌ يونيورسٽيءَ مان ’ڪميونيڪيٽر‘ نالي خبرنامي جو ايڊيٽر به رهيو. ايم. اي جي ڊگري وٺڻ کان پوءِ ساڳئي سال پريس انسٽيٽيوٽ آف پاڪستان ڪراچيءَ ۾ هڪ سال تائين ريسرچ آفيسر رهيو. بعد ۾ ڪراچيءَ مان نڪرندڙ انگريزي اخبار ”سنڌ ايڪسپريس“ جو حيدرآباد ۾ بيورو چيف پڻ رهيو. ان کان اڳ ”فرنٽيئر پوسٽ“ حيدرآباد بيورو آفيس ۾ صحافت جي عملي سکيا ورتائين. سندس ڇپيل ڪتابن ۾ (1)”جديد صحافت“ (2) ”دنيا جون مشهور شخصيتون“ (ترجمو) ۽ ”پرنٽ ٽيڪنالاجيءَ جي ڊڪشنري“ اچي وڃن ٿا، جڏهن ته هڪ ڪتاب ’ماس ميڊيا‘ ڇپائيءَ هيٺ آهن. ان کان سواءِ مرزا قليچ بيگ تي سنڌي ٻولي نمبر محترم تاج جويي سان گڏجي ترتيب ڏنائين. جيڪو 1993ع ۾ ڇپيو. مئي 1992ع ۾ سنڌي لئنگئيج اٿارٽيءَ ۾ ريسرچ اسسٽنٽ طور ڀرتي ٿيو، 10 آڪٽوبر 1992ع تي کيس پبليڪيشن ڪوآرڊينيٽر مقرر ڪيو ويو. 1 آگسٽ 1995ع تي پبليڪيشن آفيسر مقرر ٿيو. ٻولي اٿارٽيءَ جي خبرنامي ’سنڌي ٻولي جو باني ايڊيٽر‘ آهي، جيڪو هن وقت تائين سلسليوار شايع ٿي رهيو آهي. ان کان علاوه هن اٿارٽيءَ جا 3 سووينيئر ترتيب ڏنا آهن. 1992ع کان 2001 تائين پروگرام شعبي جون ذميداريون نڀايائين ۽ 1992ع کان 1997ع تائين پبلڪ رليشن آفيسر به رهيو. جنوري 2001ع ۾ اٿارٽيءَ جو بيورو آف پبليڪيشن ۽ پراڊڪشن قائم ٿيو ته امين لغاريءَ کي ان جو ڊائريڪٽر مقرر ڪيو ويو. سنڌ ٽيڪسٽ بڪ بورڊ جي پرائمري نصابي ڪاميٽيءَ جو ميمبر پڻ رهيو. ’الک‘ گروپ آف پبليڪيشن جي سنڌ لائيٽ جي ايڊيٽوريل بورڊ جو ميمبر پڻ رهيو. هن وقت ڊائريڪٽر پبلڪيشن اينڊ پراڊڪشن طور سنڌي لئنگئيج اٿارٽيءَ ۾ ڪم ڪري رهيو آهي.


هن صفحي کي شيئر ڪريو

داخلا ۾ استعمال ٿيل تاريخون

1966.06.07  عيسوي

امين لغاري 7 جون 1966ع تي ڳوٺ جعفر خان لغاري ، تعلقي سنجهوري ، ضلعي سانگهڙ ۾ جنم ورتو



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون