داخلا نمبر 4147
عنوان بلاول زرداري
شاخ شخصيتون
پڙهيو ويو 159 ڀيرا
داخلا جو حوالو انسائيڪلوپيڊيا سنڌيانا پهرين جلد جو ضميمو

بلاول زرداري

بلاول زرداري: بلاول زرداري ڪلهوڙن جي دور ۾ ميان نصير محمد خان ڪلهوڙي جي خاص اميرن ۽ وزيرن مان هو. ميان شاهه علي ڪلهوڙي جي شهادت 1068هه/1657ع کان پوءِ سندس ڀائٽيو ميان نصير محمد ڪلهوڙو تخت نشين ٿيو . ميان نصير محمد 1086هه/1675ع ۾ گرفتار ٿيو ۽ حالت کي مد نظر رکندي، هن کي 1092هه/1681ع ۾ آزاد ڪيو ويو ۽ هو سنڌ واپس پهتو، اهو سال ڪلهوڙن جي سنڌ ۾ حڪومت جي آغاز وارو سال آهي. ميان نصير محمد يارهن سال حڪومت هلائي 1103هه/1692ع ۾ وفات ڪئي. لاکاٽ تي قبضي کان پوءِ بلاول زرداريءَ کي اتي ئي ڪلهوڙن حاڪمن طرفان جاگير ڏني وئي. هي بهادر شخص هو. سندس مقبرو نواب شاهه ڀرسان آهي. سندس پٽ سردار خان ۽ پوٽو دلاور خان زرداري هالاڻيءَ جي جنگ ۾ ڪلهوڙن جي لشڪر ۾ هئا ۽ ٽالپر حاڪمن جي لشڪر سان وڙهندي جنگ ۾ شهيد ٿيا. ڪتاب ”ڪلهوڙا دور حڪومت“ ۾ غلام محمد لاکو لکي ٿو ته: ”مشهور سياستدان حاڪم علي زرداري ۽ آصف علي زرداري (پاڪستان جو صدر) بلاول فقير جي خاندان مان آهن.“


هن صفحي کي شيئر ڪريو