داخلا نمبر 3369
عنوان بلوچ سرور
شاخ شخصيتون
پڙهيو ويو 325 ڀيرا
داخلا جو حوالو انسائيڪلوپيڊيا سنڌيانا جلد پهريون
سرور بلوچ

سرور بلوچ

بلوچ سرور

بلوچ سرور: مشهور براڊ ڪاسٽر سرور بلوچ، دڙي محلي لاڙڪاڻي ۾ 23 مارچ 1929ع تي جنم ورتو. پرائمري تعليم دڙي محلي مان ۽ ميٽرڪ ميونپسل هاءِ اسڪول لاڙڪاڻي مان ۽ بي. اي سنڌ يونيورسٽي ڄامشوري مان ڪيائين. هن مختلف نوڪريون ڪيون، جهڙوڪ دڙي محلي جي اسڪول ۾ پرائمري ماستر ٿيو، رائل ٽاڪيز (سئنيما) ۾ بڪنگ ڪلارڪ طور ڪم ڪيائين. ان وقت ڪرما باغ لاڙڪاڻي ۾ لوڪل براڊ ڪاسٽنگ ٿيندي هئي، جتي 1943ع کان 1945ع تائين انائونسر رهيو. کيس ڳائڻ جو به شوق هو، ان ڪري 1958ع کان ريڊيو پاڪستان ۽ ڪراچيءَ سان وابستگي ٿيس. ريڊيو پاڪستان حيدرآباد جو اسٽاف آرٽسٽ ۽ انائونسر ٿيو. ”جمهور جي آواز“ پروگرام ۾ ڪمال خان جو ڪردار ادا ڪيائين. ڊرامن ۾ ”صوتي اثرات“ ڏنائين، لوڪ گيتن کي ريڊيو تان متعارف ڪرايائين. ”ٻارن جي ٻاري پروگرام“ جو ”ادا“ رهيو. ريڊيو جي سدا بهار پروگرامن ”اوهان جو خط پهتو“، ”سيرت النبيءَ مان اقتباس“، ”ٻارن جي ٻاري“، ”اوهان جي فرمائش“، ”يونيورسٽي مئگزن“، ”گيتن ڀريون ڪهاڻيون“ وغيره مقبول بنائڻ ۾ سرور بلوچ جو وڏو هٿ آهي. پروڊيوسر جي حيثيت ۾ لازوال پروگرامن جي تخليق ڪري، انهن تي شاهه جي بيتن جا نالا ڏنائين، جن ۾ ”ڪڙو منجهه ڪڙي“، ”لوچين سي لهن“، ”ويا سي وينجهار“، ”چارڻ چوريو چنگ“ ۽ ٻيا اچي وڃن ٿا. سرور بلوچ 1986ع ۾ سينيئر پروڊيوسر بڻيو. 23 مارچ 1989ع تي رٽائر ڪيائين ۽ 2 جنوري 1990ع تي فجر جي وقت هن دنيا مان، ريڊيو جو هي امر آواز هميشه لاءِ پرواز ڪري ويو .


هن صفحي کي شيئر ڪريو

داخلا ۾ استعمال ٿيل تاريخون

1929.03.23  عيسوي

سرور بلوچ، لاڙڪاڻي ۾ 23 مارچ 1929ع تي جنم ورتو.


1990.01.02  عيسوي

سرور بلوچ، 2 جنوري 1990ع تي وفات ڪئي.



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون