داخلا نمبر 7983
عنوان جميل جالبي ڊاڪٽر
شاخ شخصيتون
پڙهيو ويو 122 ڀيرا
داخلا جو حوالو انسائيڪلوپيڊيا سنڌيانا جلد ٽيون
ڊاڪٽر جميل جالبي

ڊاڪٽر جميل جالبي

جميل جالبي ڊاڪٽر

جميل جالبي ، ڊاڪٽر: اردوءَ جو ناميارو اديب ، نقاد ۽ محقق ، ڊاڪٽر جميل جالبي ، 1 جولاءِ 1929ع تي عليڳڙهه ۾ ڄائو . ايم . اي ( انگريزي ) 1949ع ۾ ۽ ايم . اي ( اردو ) 1950ع ۾ ڪيائين . ان سان گڏ ئي 1950ع ۾ ايل . ايل . بي جو امتحان پاس ڪيائين . 1971ع ۾ ڊاڪٽر غلام مصطفيٰ خان جي نگرانيءَ ۾ ، سنڌ يونيورسٽيءَ مان ڊاڪٽريٽ جي ڊگري ورتائين ۽ 1975ع ۾ ڊي . لٽ جي ڊگري ورتائين . شروعات ۾ انڪم ٽيڪس کاتي ۾ ملازم رهيو . 1983ع کان 1987ع تائين ڪراچي يونيورسٽيءَ جو وائيس چانسلر رهيو . ان بعد کيس 1987ع کان 1994ع تائين نيشنل لئنگئيج اٿارٽيءَ جو چيئرمئن مقرر ڪيو ويو . 1991ع کان 1998ع تائين اردو لغت بورڊ جي اعزازي صدر طور خدمتون سرانجام ڏنائين . ادب ۾ سندس دلچسپيءَ جو موضوع تحقيق رهيو آهي . سندس 40 کن ڪتاب ڇپيل آهن . سندس تنقيد جي موضوع تي ڇپيل ڪتابن ۾: ’تنقيد اور تجربه ‘ ( 1967ع ) ، ’مير تقي مير ‘ ( هڪ مطالعو: 1981ع ) ، ’ادب ڪلچر اور مسائل ‘ ( 1986ع ) ، ’ن . م راشد- ايڪ مطالعه ‘ ( 1986ع ) ، ’معاصر ادب ‘ ( 1991ع ) ، ’قومي زبان ، يڪجهتي ، نفاذ اور مسائل ‘ ( 1989ع ) ، ’قلندر بخش ” جراءت “ ‘ ( لکنوي تهذيب جو نمائنده شاعر: 1990ع ) ۽ ’ميراجي- ايڪ مطالعه ‘ ( 1990ع ) شامل آهن .
تحقيق جي موضوع تي سندس ڪتاب: ’ديوان حسن شوقي ‘ ( 1971ع ) ، ’ديوان نصرتي ‘ ( 1972ع ) ، ’مثنوي ڪدم رائو ، پدم رائو ‘ ( 1973ع ) ، ’ادبي تحقيق ‘ ( 1994ع ) تي لکيل آهن . سندس تيار ۽ ايڊٽ ڪيل لغتن ۾: ’قديم اردو ڪي لغت ‘ ( 1973ع ) ، ’فرهنگ اصلاحات جامعه عثمانيه ‘ ( جلد پهريون: 1991ع ) ، ’قومي انگريزي اردو لغت ‘ ( 1992ع ) ، ’فرهنگ اصلاحات جامعه عثمانيه ‘ ( جلد ٻيو: 1993ع ) شامل آهن . تاريخ جي موضوع تي: ’تاريخ ادب اردو ‘ ( جلد پهريون: 1975ع ) ، جلد ٻيو ( حصو پهريون: 1982ع ) ، جلد ٻيو حصو ٻيو ( 1982ع ) ، جلد ٽيون ( 2006ع ) ڇپيل اٿس ۽ سندس ترجمن ۾: ’ايليٽ ڪي مضامين ‘ ( 1990ع ) ، ’ارسطو سي ايليٽ تڪ ‘ ( 1975ع ) ، ’برصغير ۾ اسلامي جديديت ‘ ( 1989ع ) ، ’برصغير ۾ اسلامي ڪلچر ‘ ( 1990ع ) ، ’بوطيفا از: ارسطو ‘ ( 1998ع ) شامل آهن ، جڏهن ته ڪلچر جي موضوع تي ڪجهه انگريزي ڪتاب ۽ ڪجهه ٻاراڻي ادب ۾ به ڪتاب ڇپيل آهن .
ڊاڪٽر جميل جالبيءَ جي زندگي ۽ شخصيتن تي به ٽي ڪتاب ڇپيل آهـن . کـيـس ڪيترن ئي اعزازن ۽ انعامن سان نوازيو ويو آهي ، جن ۾ ’دائـود ادبـي انـعـام ‘ ( 1954ع ، 1973ع ، 1974ع ، 1975ع ) ، پـاڪـسـتـان حڪومت طرفان ’ستاره امتياز ‘ ( 1990ع ) ، ’طفيل ادبي اوارڊ ‘ ( 1990ع ) ۽ ’هلال امتياز پاڪستان حڪومت ‘ ( 1994ع ) شامل آهن . هن وقت ڪراچيءَ ۾ رهي ٿو .


هن صفحي کي شيئر ڪريو

داخلا ۾ استعمال ٿيل تاريخون

1929.07.01  عيسوي

ڊاڪٽر جميل جالبي ، 1 جولاءِ 1929ع تي عليڳڙهه ۾ ڄائو .



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون