داخلا نمبر 8004
عنوان جنجهي يارمحمد ڊاڪٽر
شاخ شخصيتون
پڙهيو ويو 99 ڀيرا
داخلا جو حوالو انسائيڪلوپيڊيا سنڌيانا جلد ٽيون
جنجهي يارمحمد ڊاڪٽر

جنجهي يارمحمد ڊاڪٽر

جنجهي يارمحمد ڊاڪٽر

جنجهي، يارمحمد، ڊاڪٽر: ڊاڪٽر يار محمد جنجهي، ميرپورخاص جو مشهور ڊاڪٽر ۽ سماجي خدمتگار ٿي گذريو آهي. سندس جنم ڳوٺ واحد ڏني جنجهي نزد ميرپور پراڻيءَ ۾ حاجي محمد صديق جي گهر، 3 ڊسمبر 1946ع تي ٿيو. اڃا هڪ سال جو هو ته سندس والد گذاري ويو ۽ کيس وڏي ڀاءُ محمد يوسف پاليو ۽ پڙهايو. مڊل اسڪول تائين تعليم ميرپور پراڻيءَ ۾ حاصل ڪرڻ کان پوءِ پبلڪ اسڪول اسڪول حيدرآباد ۾ داخل ٿيو ۽ امتيازي نمبرن سان انٽر جو امتحان پاس ڪري، 1965 ۾ ميڊيڪل جي تعليم پرائڻ لاءِ لياقت ميڊيڪل ڪاليج ڄام شوري ۾ داخل ٿيو ۽ 1970ع ۾ امتيازي نمبرن سان ايم. بي. بي. ايس جو امتحان پاس ڪري، 1971ع ۾ نوڪريءَ ۾ داخل ٿيو. سندس پهرين مقرري ڪنريءَ ۾ ٿي. پر سندس ڀاءُ محمد يوسف جي گذاري وڃڻ سبب نوڪريءَ کي خدا حافظ چئي ميرپورخاص آيو ۽ ميونسپالٽيءَ ۾ سروس ڪرڻ سان گڏ زمينداري ۽ راڄداري سنڀالڻ لڳو. 1974ع ۾ اها نوڪري به ڇڏي، ڪل وقتي خانگي پريڪٽس ڪرڻ ۽ زمينداريءَ کي سنڀالڻ لڳو. سندس سياسي وابستگي پاڪستان پيپلز پارٽي سان ۽ روحاني رشتو مخدوم سرور نوح جي خاندان سان رهيو. سياسي سفر ۾ ايم. آر. ڊيءَ دوران جيل به ويو. شڪار ۽ فوٽوگرافيءَ جو شوقين هوندو هو. سماجي خدمت کي عبادت سمجهندو هو، ان ڪري ميرپورخاص جي هر سماجي تنظيم سان گڏجي هن عوامي ڀلائيءَ جا ڪم ڪيا. هن روٽري ڪلب، سنڌ ايجوڪيشن سوسائٽي، جنجهي برادرس ائسوسيئيشن، سنڌ سمال انڊسٽريز ميرپورخاص، چيمبر آف ايگريڪلچر ميرپورخاص، پاڪستان ميڊيڪل ائسوسيئيشن ميرپورخاص جي صدر طور خدمتون سرانجام ڏنيون. سروري تنظيم ۾ هيلٿ سيڪريٽري طور خدمتون سرانجام ڏنائين. ميرپورخاص جو هي هر دلعزيز فرد، ڪينسر جهڙي موذي مرض ۾، 2009ع ۾ زندگيءَ جي جنگ هارائي ويو. اڄ به ميرپورخاص جا شهري، هن انساني همدرد کي ياد ڪن ٿا .


هن صفحي کي شيئر ڪريو

داخلا ۾ استعمال ٿيل تاريخون

1946.12.03  عيسوي

ڊاڪٽر يار محمد جنجهي جو جنم ڳوٺ واحد ڏني جنجهي نزد ميرپور پراڻيءَ ۾ حاجي محمد صديق جي گهر ، 3 ڊسمبر 1946ع تي ٿيو .


2009.00.00  عيسوي

ڊاڪٽر يار محمد ڪينسر جهڙي موذي مرض ۾ ، 2009ع ۾ زندگيءَ جي جنگ هارائي ويو .



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون