داخلا نمبر 5331
عنوان ٺٽوي محمد ڪريم اصفهاني
شاخ شخصيتون
پڙهيو ويو 241 ڀيرا
داخلا جو حوالو انسائيڪلوپيڊيا سنڌيانا جلد ٻيو

ٺٽوي محمد ڪريم اصفهاني

ٺٽوي، محمد ڪريم اصفهاني: محمد ڪريم اصفهاني سلطان فرخ سير جي زماني ۾ امير محمد رضي خان ٺٽي جي حاڪم سان گڏ 1137هه/1724ع ۾ دهليءَ مان ٺٽي پهتو. وڏيءَ عزت سان سرڪاري عهدي تي رهيو. جڏهن نادر شاهه ملڪ تي حملي آور ٿيو، تڏهن هي امين الملڪ ۽ وڪيل رعايا جي عهدي تي پهتو. ننڍا وڏا سندس سخا ۽ مروت کان ڏاڍا خوش هوندا هئا. سندس مجلس ۾ هميشه شاعرن جو ٽولو موجود رهندو هو. هر هڪ جي قدر آهر خدمت ۽ مدد ڪندو هو. هو گهڻو پڙهيل نه هو، پر پوءِ به پنهنجي طبعي ذهانت ڪري عمدو شعر چوندو هو، شعر ۾ ’عاشق‘ تخلص استعمال ڪندو هو. ٺٽي جو مشهور شاعر محمد محسن ٺٽوي سندس استاد ۽ صحبتي هو. محسن جو مشهور ڪتاب ”محک الکمال“ به اصفهاني محمد ڪريم جي مدد سان جمع ٿيل آهي. سندس ڪن غزلن جا جواب مير قانع لکيا آهن، جن جو تفصيل مقالات الشعراءِ ۾ موجود آهي. محمد ڪريم اصفهاني ٺٽويءَ جي وفات ٺٽي ۾ 1155هه/ 1742ع ۾ ٿي.


هن صفحي کي شيئر ڪريو