داخلا نمبر 5605
عنوان ٽائن بي ٽوائن بي آرنولڊ
شاخ شخصيتون
پڙهيو ويو 278 ڀيرا
داخلا جو حوالو انسائيڪلوپيڊيا سنڌيانا جلد ٻيو

هن داخلا جون تصويرون موجود ناهن

ٽائن بي ٽوائن بي آرنولڊ

ٽائن بي/ ٽوائن بي، آرنولڊ: عالمي شهرت يافته برطانوي فلسفي ۽ تاريخ دان آرنولڊ ٽائن بي (Arnold Toynbee) 14 اپريل 1889ع تي هڪ علمي گھراڻي ۾ ڄائو. سندس والده شروع کان ئي تاريخ ڏانهن مائل هئي. اڳتي هلي اهو ئي سندس موضوع بنيو. هن ونچسٽر ۽ آڪسفورڊ مان تعليم حاصل ڪري وظيفو ورتو. هڪ سال لاءِ يونان ۽ ترڪي وڃي اتان جي تاريخ جو مطالعو ڪري واپس اچي بليل ڪاليج آڪسفورڊ ۾ رومي ۽ يوناني تاريخ جو استاد مقرر ٿيو. پهرين مهاڀاري لڙائي ۾ کيس پوليٽيڪل انٽيليجنس ڊپارٽمنٽ لنڊن ۾ ترڪيءَ جي معاملن جو انچارج مقرر ڪيو ويو. ان کان پوءِ پيرس ۾ برطانوي امن ڪانفرنس جو اهم رڪن مقرر ڪيو ويو. 1919ع ۾ بازنطيني ۽ جديد يوناني مطالعي جو پرفيسر مقرر ٿيو. 1921ع ۾ يونان ترڪي جنگ دوران مانچسٽر گارڊين طرفان خصوصي نمانئندي طور ترڪي جو سفر ڪيائين ۽ انهيءَ موقعي تي ڪتاب ”يونان ۽ ترڪي جو مغربي مسئلو“ لکيائين. 1924ع ۾ هن بين الاقوامي معاملن جي رائل انسٽيٽيوٽ جي رڪنيت حاصل ڪئي ۽ ساڳئي سال ڊائريڪٽر آف اسٽڊيز مقرر ڪيو ويو. انهيءَ عهدي تي هو 1955ع تائين لنڊن يونيورسٽيءَ ۾ ريسرچ پروفيسر طور استاد رهيو. انهي عرصي دوران انسٽيٽيوٽ طرفان شايع ٿيندڙ عالمي واقعن جي سالياني رپورٽ جو مدير به رهيو. هن دنيا جي تاريخ جي مطالعي تي ڪتاب ”اي اسٽڊي آف هسٽري“ لکيو جنهن ڪري سندس ناماچاري سڄي دنيا ۾ ٿي، هن ڪتاب جا ڇهه جلد پهرين عالمگير جنگ کان اڳ ۽ ڇهه جلد پوءِ شايع ٿيا. هن انهي ڪتاب لکڻ جي شروعات 1927ع کان ڪئي هئي. سندس ٻين ڪتابن ۾ ”دنياءِ مغرب“ (1952ع)، ”مورخ جو مذهب سان تعلق“ (1953ع)، ”عيسائيت-مذهبي عالمن جي نظر ۾“ وغيره لکيا. سندس چوڻ هو ته دنيا جي تاريخ اصل ۾ دنيا جي مذهبن جي تاريخ آهي. نوڪري تان رٽائر ٿيڻ بعد راڪ فيلڊ فائونڊيشن کيس 18 مهينن لاءِ وظيفو ڏنو ته هو دنيا گھمي. هن انهن ارڙهن مهينن جي سياحت دوران ڪتاب ”هنر بال جي ميراث“ لکيو. ان کان سواءِ سندس ڪتابن ۾ ”ايڪوئيٽيسنز“، ”سوانحي تجربا“، ”آپ بيتي“، ”موت سان ماڻهو جو مقابلو“ ۽ ”سندس آخري ڪتاب ”سٽيزن آف دي مووِ“ آهي.
ٽائين بي ٻه شاديون ڪيون هيون. پهرين شادي پروفيسر گلبرٽ مري جي ڌيءُ روز لنڊ سان ۽ ٻي شادي 1940ع ۾ ويرونيڪا بولٽر سان جنهن لکڻ ۾ سندس گھڻو هٿ ونڊايو. ٽائن بي گهڻو لکڻ پڙهڻ وارو ماڻهو هو . هن ڪيترن ئي ملڪن جا دورا ڪيا ۽ ليڪچر ڏنا. ڪيترين ئي يونيورسٽين کيس اعزازي ڊگريون عطا ڪيون. 1965ع ۾ چرچل جي وفات کان پوءِ کيس ” فرنچ اڪيڊمي آف مورال اينڊ پوليٽيڪل سائنسز“ جو مکيه ميمبر چونڊيو ويو. هن 22 آڪٽوبر 1975ع تي وفات ڪئي.


هن صفحي کي شيئر ڪريو

داخلا ۾ استعمال ٿيل تاريخون

1889.04.14  عيسوي

آرنولڊ ٽائن بي 14 اپريل 1889ع تي هڪ علمي گھراڻي ۾ ڄائو


1975.10.22  عيسوي

آرنولڊ ٽائن بي 22 آڪٽوبر 1975ع تي وفات ڪئي



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون