داخلا نمبر 6452
عنوان ٿامس هينري ونس
شاخ شخصيتون
پڙهيو ويو 170 ڀيرا
داخلا جو حوالو انسائيڪلوپيڊيا سنڌيانا جلد ٻيو
ٿامس هينري ونس

ٿامس هينري ونس

ٿامس هينري ونس

ٿامس هينري ونس: سنڌ مدرسة الاسلام جو اڳوڻو پرنسپال ، ٿامس هينري انگلنڊ جي آڪسفورڊ يونيورسٽيءَ مان ماسٽرس جي ڊگري حاصل ڪرڻ کان پوءِ محمدن ائنگلو اوريئنٽل ڪاليج علي ڳڙهه ۾ استاد مقرر ٿيو . ان کان پوءِ کيس 1903ع ۾ ” سنڌ مدرسة الاسلام “ ڪراچيءَ جو پرنسپال مقرر ڪيو ويو . مسٽر ٿامس جو شمار سنڌ مدرسي ۾ حسن علي آفنديءَ کان پوءِ ٻئي نمبر تي اهم پرنسپالن ۾ ٿئي ٿو . هن جي دؤر ۾ ئي اڌ کان وڌيڪ اسڪول جي عمارت کي ٺاهيو ويو . مسٽر ٿامس پنهنجي زندگيءَ جا اوڻيهه سال سنڌ مدرسي جو پرنسپال رهيو . هن سنڌ مدرسي ۾ تعليمي ماحول پيدا ڪرڻ لاءِ ڏينهن رات محنت ڪئي . هن سنڌ مدرسي جي اڏاوت لاءِ سنڌ جي پيرن ، ميرن ، وڏيرن ۽ خوشحال ماڻهن کان چندو پڻ گڏ ڪيو . سندس دؤر ۾ تعليم تمام سٺي ڏني ويندي هئي ، جنهنڪري ” سنڌ مدرسي “ جو نالو تمام گهڻو مشهور ٿيو . سندس بهترين شاگردن ۾ ويهين صديءَ جا مشهور عالم ۽ سياستدان علامه آءِ آءِ قاضي ، سر شاهنواز ڀٽو ۽ علي خان ابڙو شمار ڪيا وڃن ٿا . مدرسي ۾ تعليم سان گڏوگڏ راندين تي به گهڻو ڌيان ڏنو ويندو هو . ٿامس هينري جي زندگيءَ بابت گهڻي معلومات نه ملي آهي ، پر تڏهن به چئي سگهجي ٿو ته هو نهايت هوشيار ، محنتي ۽ تعليم سان پيار ڪندڙ ماڻهو هو . سنڌ مدرسي جي هن عظيم پرنسپال جو انتقال 1922ع ۾ ٿيو .


هن صفحي کي شيئر ڪريو