داخلا جي تاريخ 2012-11-27
داخلا نمبر 4765
عنوان ڀٽو ممتاز علي
شاخ شخصيتون
پڙهيو ويو 500 ڀيرا
داخلا جو حوالو انسائيڪلوپيڊيا سنڌيانا جلد ٻيو
ممتاز علي  ڀٽو

ممتاز علي ڀٽو

ڀٽو ممتاز علي

ڀٽو، ممتاز علي: ناميارو سياستدان ممتاز علي ڀٽو 29 نومبر 1933ع تي ڳوٺ پير بخش ڀٽي، ضلعي لاڙڪاڻي ۾ ڄائو. هو شهيد ذوالفقار علي ڀٽي جو سئوٽ ۽ سنڌ نيشنل فرنٽ جو چيئرمئن آهي. ماضيءَ ۾ پيپلزپارٽيءَ جو ميمبر، وفاقي وزير، گورنر ۽ سنڌ جو وڏو وزير به رهيو آهي. هن پرائمري تعليم پنهنجي اباڻي ڳوٺ ۽ باقي تعليم ميسور (ڀارت) مان تعليم حاصل ڪئي. 1959ع ۾ ’لنڪنس اِن‘ مان ’بار ايٽ لا‘ ڪيائين ۽ 1963ع ۾ آڪسفورڊ يونيورسٽيءَ مان ماسٽرس جي ڊگري ورتي. مارچ 1965ع ۾ 32 سالن جي عمر ۾ قومي اسيمبليءَ جو ميمبر چونڊيو. جڏهن ذوالفقار علي ڀٽي 30 مارچ 1967ع تي پيپلز پارٽي ٺاهي ته هي ان جو بنيادي ميمبر رهيو. 1970ع واري چونڊ ۾ سندس مقابلو قاضي فضل الله سان ٿيو ۽ هن اها چونڊ کٽي. 24 ڊسمبر 1971ع تي ذوالفقار علي ڀٽي کيس سڏي، پهريان سنڌ جو گورنر ۽ پوءِ پهرين مئي 1972ع تي سنڌ جو وڏو وزير مقرر ڪيو.
سنڌ جي وڏي وزير طور هن سنڌي ٻوليءَ کي سرڪاري زبان جو درجي ڏيڻ جو سنڌ اسيمبليءَ مان ائڪٽ پاس ڪرائي سنڌي زبان کي اسڪولن ۾ لازمي قرار ڏياريو، پر ان جي ڪجهه نام نهاد اردو دان طبقن طرفان مخالفت ٿيڻ سبب سنڌ ۾ لساني فساد ٿيا ۽ نتيجي طور مرڪز جي مداخلت تي مير رسول بخش ٽالپور، گورنر سنڌ طور سنڌيءَ سان گڏ اردوءَ کي به سنڌ جي ٻي سرڪاري زبان جو درجو ڏنو ويو.
ممتاز علي ڀٽو سٺي ايڊمنسٽريٽر طور مشهور ٿيو. 7 جنوري 1977ع تي ٿيل چونڊن ۾ هو هڪ دفعو وري قومي اسيمبليءَ جو ميمبر چونڊجي آيو. 1977ع ۾ ذوالفقار علي ڀٽي کيس پيپلز پارٽي سنڌ جو صدر مقرر ڪيو. ڀٽي صاحب جي حڪومت ختم ٿيڻ بعد کيس ضياءُ الحق گرفتار ڪري ورتو. بعد ۾ هو ملڪ کان ٻاهر هليو ويو. 31 مارچ 1985ع ۾ هن لنڊن ۾ سنڌي بلوچ پشتون فرنٽ جي نالي سان نئون اتحاد ٺاهيو ۽ پاڻ ان جو ڪنيوينر مقرر ٿيو. مارچ 1989ع ۾ حيدرآباد ۾ هن ورڪرز ڪنوينشن ڪوٺايو، جنهن ۾ هن سنڌ نيشنل فرنٽ جي نالي سان سنڌ سطح تي نئين پارٽيءَ جوڙي، جنهن جو پاڻ چيئرمئن ٿيو. پاڪستان ۾ ڪنفيڊرل نظام قائم ڪرڻ هن پارٽيءَ جي منشور جو مکيه نقطو آهي. 1993ع ۾ لاڙڪاڻي مان سنڌ اسيمبليءَ جو ميمبر چونڊيو ۽ 6 نومبر 1996ع ۾ جڏهن صدر فاروق احمد لغاريءَ بينظير ڀٽو جي حڪومت کي برطرف ڪيو ته ان بعد ممتاز علي ڀٽي کي سنڌ جو نگران وڏو وزير مقرر ڪيو ويو. شهيد ذوالفقار علي ڀٽو کيس گهڻو ڀائيندو هو، کيس پنهنجو ”ٽيلينٽِڊ ڪزن“ سڏيندو هو. ويجهي ماضيءَ ۾ ممتاز علي ڀُٽي شهيد بينظير ڀٽو جي پارٽي پاليسين سان اختلاف رکيا، جڏهن ته هاڻوڪي حڪومت تي پڻ تنقيد ڪندو رهي ٿو. شڪار جو شوقين ممتاز علي ڀٽو مطالعي جو ذوق به رکي ٿو، ڪجهه سال اڳ هن سنڌ جي قومپرست پارٽين سان گڏجي ”سنڌ قومي اتحاد“ ٺاهيو، جيڪو پائدار ثابت نه ٿيو. هن وقت پنهنجي ڳوٺ ۾ پنهنجي جاگير جا معاملا سنڀالي رهيو آهي، جڏهن ته پنهنجي فرزند امير بخش ڀُٽي سان گڏ پنهنجي پارٽيءَ ”سنڌ نيشنل فرنٽ“ کي پڻ متحرڪ رکندو اچي ٿو.


هن صفحي کي شيئر ڪريو

داخلا ۾ استعمال ٿيل تاريخون

1933.11.29  عيسوي

ممتاز علي ڀٽو 29 نومبر 1933ع تي ڳوٺ پير بخش ڀٽي ، ضلعي لاڙڪاڻي ۾ ڄائو



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون