داخلا نمبر 8564
عنوان چانڊيو، عبدالحميد
شاخ شخصيتون
پڙهيو ويو 4 ڀيرا
داخلا جو حوالو انسائيڪلوپيڊيا سنڌيانا جلد چوٿون
عبدالحميد چانڊيو

عبدالحميد چانڊيو

چانڊيو، عبدالحميد

چانڊيو، عبدالحميد: نامور ديني عالم، مولوي عبدالحميد ولد مولوي عبدالله چانڊيو، 5 جنوري 1934ع تي سيتا روڊ، ضلعي دادوءَ ۾ ڄائو. سندس والد جيد عالم ٿي گذريو آهي ۽ اصل ملان جي ڳوٺ، ضلعي شڪارپور جو رهاڪو هو ۽ بعد ۾ لڏي اچي سيتا روڊ ۾ رهيو. مولوي عبدالحميد چانڊيي جو تعلق فقهه جعفريه سان هو. هن ابتدائي تعليم گٽهڙ (ضلعي لاڙڪاڻي) ۾ حاصل ڪئي. عربي، فارسي ۽ ديني تعليم پنهنجي والد وٽان پڙهي وڌيڪ تعليم ٺيڙهي ۽ گوري پهوڙ جي مدرسن ۾ حاصل ڪيائين. سندس والد ديوبند مسلڪ سان وابسته هو، جنهن کيس تعليم ۽ تربيت ان مسلڪ مطابق ڏياري، پر جڏهن عبدالمجيد چانڊيو 26 سالن جو ٿيو ته سندس طبيعت جو لاڙو فقھ جعفريه طرف ٿيو ۽ هن شيعه ’اثنا عشريه‘ مسلڪ اختيار ڪيو. فن خطابت ۾ وڏي شهرت رکندو هو. سنڌي ۽ اردو زبانن ۾ فصيح ۽ بليغ انداز ۾ تقرير ڪندو هو. هر مسئلي جو حل قرآن پاڪ ۽ حديث جي روشنيءَ ۾ علمي ۽ عقلي دليلن سان پيش ڪندو هو. ملڪ جي ڪنڊ ڪڙڇ ۾ اهلبيت ڪرام جي ياد ۾ ٿيندڙ مجلسن ۾ گهڻوڪري کيس گهرايو ويندو هو. هر سال محرم الحرام جا ڏهه ڏينهن پنجاب ۾ مختلف مجلسن ۾ گذاريندو هو. مجلس ۾ مصائب پڙهڻ وقت ٻڌندڙن تي سحر طاري ڪري ڇڏيندو هو، ان ڪري کيس ’شهنشاهه مصائب‘ به سڏيو ويو. مولوي عبدالحميد حق گوئيءَ ۾ به مشهور هو. وقت جي ڪنهن حڪمران کان خائف نه ٿيو. سندس تقريرن جون 50 کان وڌيڪ آڊيو ۽ وڊيو ڪئسٽون رليز ٿيل آهن. مولوي عبدالحميد شروعاتي دور ۾ سياست سان به وابسته رهيو. ڪجهه عرصو ڪامريڊ حيدر بخش جتوئيءَ سان گڏ سنڌ هاري ڪميٽيءَ ۾ ڪم ڪيائين. 1970ع کان پوءِ ڪجهه وقت سياسي طرح شهيد ذوالفقار علي ڀُٽي سان به رهيو.
هن عالم دل جي دوري سبب 2003ع ۾ وفات ڪئي. سندس آخري آرام گاهه شيخ زيد موڙ قبرستان لاڙڪاڻي ۾ پنهنجي والد جي ڀر ۾ آهي


هن صفحي کي شيئر ڪريو

داخلا ۾ استعمال ٿيل تاريخون

1934.01.05  عيسوي

نامور ديني عالم، مولوي عبدالحميد ولد مولوي عبدالله چانڊيو، 5 جنوري 1934ع تي سيتا روڊ، ضلعي دادوءَ ۾ ڄائو.



شخصيتون - ڀاڱي جون ٻِيون داخلائون

بابا بنکنڊي مهراج
بابا حاجي ميرمحمد
بابا سريچند
بابا صلاح الدين
بابا فريد مسعود گنج شڪر
بابا گرپت صاحب
بابا گوبند داس
بابا نيڀراڄ
بابر بادشاهه
بابو
شخصيتون ڀاڱي جا وڌيڪ مضمون