چنا، محمد منير: محمد منير چنا سٺو ۽ هوشيار وڪيل هو. محمد منير چنا ولد مولانا دين محمد 15 سيپٽمبر 1922ع تي ڳوٺ فيروز شاهه، ضلعي دادوءَ ۾ ڄائو. سندس والد ’اديب‘ فيروز شاهي بهترين اديب هو. سندن خاندان مان عالم ۽ بزرگ ٿي گذريا آهن، جن مان مخدوم احمد، مخدوم محمد ابراهيم، مخدوم اسحاق، مخدوم عبدالمجيد، مخدوم خير محمد ۽ مولانا عطاء الله فيروزشاهيءَ جا نالا قابل ذڪر آهن. منير چني جي نسب جو سلسلو حضرت مخدوم احمد سان ملي ٿو. اهڙي عملي ۽ روحاني خاندان جون صلاحيتون ۽ فضيلتون منير چني کي ورثي ۾ مليون. ننڍي هوندي کان ئي هو هڪ هوشيار ۽ ذهين شاگرد هو. ابتدائي ديني تعليم اباڻي ڳوٺ مان وٺي ايم. اي ۽ ايل. ايل. بي جا امتحان پاس ڪري وڪالت جو پيشو اختيار ڪيائين. ڀرڳڙي روڊ حيدرآباد ۾ رهائش اختيار ڪيائين. حيدرآباد جي محنتي وڪيلن ۾ محنت ۽ قابليت سان پنهنجو نالو ڪڍيائين. جيتوڻيڪ هن قانون جي پيشي کي پنهنجو مستقبل بنايو هو، پر واندڪائيءَ ۾ تصنيف ۽ تاليف جي ڪم کي به جاري رکيائين. سندس ڪتابن مان ’اسلامي اڪابر‘ چڱو معلوماتي ڪتاب آهي جنهن ۾ ڪيترن بزرگن ۽ آزاديءَ جي متوالن جو ذڪر آهي. هن ڪتاب کان سواءِ منير چني جي سنڌي- انگلش ڊڪشنري (1968ع) به شايع ٿي. منير چنو بااخلاق، ملڻو جلڻو ۽ زنده دل انسان هو. غريب پرور ۽ مسڪينن کي ڏک سک ۾ ڪم ايندو هو. وڪالت جي پيشي ۾ غريبن جي هر طرح سان مدد ڪيائين. 45 سالن جي ڄمار ۾ 21 آڪٽوبر 1967ع تي وفات ڪيائين.
1922.09.15 عيسوي
محمد منير چنا ولد مولانا دين محمد 15 سيپٽمبر 1922ع تي ڳوٺ فيروز شاهه، ضلعي دادوءَ ۾ ڄائو.
1967.10.21 عيسوي
محمد منير چنا 21 آڪٽوبر 1967ع تي وفات ڪئي.