پَڙو: ڪپڙي مان ٺهيل پوشاڪ جو نمونو. پڙو گھڻو ڪري ٿرپارڪر جون هندو توڙي مسلمان عورتون سٿڻ جي بدلي پائين ٿيون. ڪي ورهيه اڳ پڙي جو لاڙ ۽ وچ سنڌ ۾ به گھڻو رواج هو. شاديءَ رات ڪنوار کي پڙو ۽ ڪنجري پارائي ويندي هئي، گهر کان ٻاهر نڪرڻ مهل پڙو پائي بوڇڻيءَ، اجرڪ يا وڏي گنديءَ جي اکڙي ڪڍي نڪربو هو، اهو شرفا جو رواج هو، جتي عورتون پنهنجي ويڙهي، پاڙي يا حويليءَ کان ٻاهر وڃڻ مهل اڳ ۾ پاتل ڪپڙن جي مٿان پڙو پائي مٿان گنديءَ سان اکڙي ڪڍي هلنديون هيون. ڀيل، باگڙي، اوڏ، ميگھواڙ ذاتين جون عورتون، عام طور پڙو پائين، راجسٿان ۽ ڪڇ ۾ ان کي ’گاگهرو‘ به چون. هي لباس عام طور لاڙ ۾ پائين، پڙو ستن کان ڏهن ميٽرن جي ڪپڙي مان ٺهي ٿو. ڪي سادا پڙا هوندا آهن، پر ڪن تي ڇُرِ جو ڪم به ٿيل هوندو آهي ته ڪنوارن جي لاءِ ٺهيل پڙن تي ٽڪن ۽ زريءَ مڙهي ڀرت ڀريو ويندو آهي.