ڀِنجُھو: سڪل مٽي، کوٽيل مٽي ۽ ڊٺل جاءِ جي مٽي وغيره کي ”ڀنجھو“ چوندا آھن. اھڙيءَ طرح سان ھيٺاھين زمين تي ڀراءُ وجھڻ لاءِ وڌل مٽيءَ، ھر ڏنل زمين (کيڙيل زمين) وارن کڙن ۽ ڀترن واري کيڙيءَ کي به ”ڀنجھو“ چوندا آھن. انھيءَ ڪري ھارين جي اصطلاح ۾ کيڙيل زمين ۾ ٻج وجھڻ کان پوءِ پھريون دفعو پاڻي ڏيڻ کي ”ڀنجھو پيارڻ“ چوندا آھن.
قبر مان نڪتل مٽيءَ کي به ”ڀنجھو“ چوندا آھن.
”ڀر ڀنجھوءَ ويھي، ڪھڙي ڪندين ڳالھڙي“ (شاھه)