چيما (ذات): چيما جٽن جو هڪ وڏو قبيلو آهي، جن جو مورث اعليٰ چيما چوهاڻ راجپوت هو، جنهن پرٿوي راڄ جي شهاب الدين محمد غوريءَ هٿان شڪست کانپوءِ، دهليءَ کان ڪانگڙا ۽ پوءِ امرتسر ڏانهن رُخ ڪيو. موجوده قبيلي جو مورث اعليٰ ڍول هو. هڪ طاقتور ۽ متحد قبيلو آهي. سندن هڪ خاندان نگال به آهي. روايت آهي ته امرتسر ۾ سندس پٽ علاؤالدين غوريءَ جي دؤر ۾ بياس نديءَ تي هڪ ڳوٺ جو بنياد رکيو. سندس پوٽو راڻا ڪنگ سڏرائيندو هو ۽ ڍول ان جي موجوده قبيلن جو وڏو ڏاڏو هو. هي پنهنجي شادين ۾ برهمڻ جي جاءِ تي جوڳين کي سڏائيندا آهن. هنن مان ڪافي مسلمان ٿي چڪا آهن، پر قديم روايتن تي اڃا به عمل ڪندا آهن. هي طاقتور ۽ مستحڪم قبيلو آهي. سيالڪوٽ ۾ هن قبيلي جو تعداد سڀ کان وڌيڪ آهي پر گوجرانواله جي لڳ ڀڳ ٻائيتاليهه ڳوٺن ۾ آباد آهن. هنن قبيلن جون روايتون قديم روايتن سان ملندڙ جلندڙ آهن. چيما ذات مان ڪيترا مشهور سياستدان ۽ صنعتڪار آهن ۽ پاڪستان جي پنجاب صوبي ۾ وڏي تعداد ۾ رهن ٿا.