آچر فقير مڱڻهار

آچر فقير مڱڻهار: فقير محمد آچر مڱڻهار 1929ع ڌاري ٽنڊي الهيار جي ڳوٺ محسن ڏگي ۾ پيدا ٿيو، سندس اصل نالو مور فقير هو. اکيون کولڻ سان سندس واسطو سُر ۽ تال سان پيو، ان لاءِ پڙهي ڪو نہ سگهيو. هن راڳ جي شروعاتي سکيا پنھنجي چاچن الهڏني فقير ۽ امين فقير کان حاصل ڪئي، جيڪي ان وقت پنھنجي تَـرَ ۾ راڄ ڀاڳ وارا ۽ ناميارا ڪلاسيڪل شرنائي نواز هئا. ان کان پوءِ ٽنڊي الهيار جي ڪلاسيڪل راڳين استاد ملڪ مظهر خان، ڪلو ڀائي ۽ محمد رمضان کان راڳ جي سکيا ورتائين. هن کي موسيقيءَ جا وڏا قدردان مليا، جن ۾ غلام رسول شاھہ جيلاني ميرپورخاص وارو، ملوڪ شاھہ بڪيرن وارو، خادم علي شاھہ، سالڪ لاکو ۽ حاجي لکانو ڪوري وغيرہ اچي وڃن ٿا. جن سندس قدرداني ۽ همت افزائي ڪئي. هن سنگيت جي کيتر ۾ خاص طور شرنائيءَ جي ميدان ۾ نوان تجربا ڪيا. سندس اوطاق سنگيت اڪيڊمي لڳندي هئي. مڱڻهارن جي ڪاڄن ۾ سرن ۽ سازن جي چٽاڀيٽيءَ دوران سنڌ جا نالي وارا جوڙ هڪ ٻئي پٺيان ميدان مارڻ لاءِ حيلا هلائيندا هئا. آچر فقير جي زندگيءَ ۾ اهڙين چٽا ڀيٽين جا ڪيترائي مرحلا آيا، پر ڪڏهن بہ ڪنهن کانئس کٽڻ تہ پري رهيو، پر همعصري جي بہ دعوا نہ ڪئي. آچر فقير نہ رڳو شرنائي وڄائڻ ۾ وڏو نالو ڪڍيو، پر هن گائڪيءَ ۾ بہ ڪمال حاصل ڪيو. سندس اوطاق تي وقت جا وڏا وڏا خانصاحب اچي پنھنجي فن جو مظاهرو ڪندا هئا، جن ۾: استاد منظور علي خان، استاد اميد علي خان، استاد امانت علي خان،
استاد محمد جمن، شادي فقير، استاد نياز حسين وغيرہ قابل ذڪر آهن. ريڊيو ۽ ٽي وي تي بہ پنھنجي فن جو مظاهرو ڪيائين. سندس ڪيتريون ئي آڊيو ڪيسٽون پڻ جاري ٿيون. هن 23 نومبر 1998ع تي وفات ڪئي ۽ پڳ سندس پُٽ رسول بخش کي ٻڌائي وئي.

داخلا ۾ استعمال ٿيل تاريخون

1929.00.00  عيسوي

آچر فقير مڱڻهار: فقير محمد آچر مڱڻهار 1929ع ڌاري ٽنڊي الهيار جي ڳوٺ محسن ڏگي ۾ پيدا ٿيو ، سندس اصل نالو مور فقير هو .

1998.00.00  عيسوي

آچر فقير مڱڻهار: هن 23 نومبر 1998ع تي وفات ڪئي ۽ پڳ سندس پُٽ رسول بخش کي ٻڌائي وئي .

شخصيتون - ڀاڱي جون ٻِيون داخلائون