ڊاڪٽرمحمد ابراهيم سنڌي

ابراهيم ”سنڌي“ ڊاڪٽر: اديب، عالم ۽ لطيف شناس، ڊاڪٽر محمد ابراهيم ولد محمد دائود سمي جو جنم 5 نومبر 1953ع تي ڳوٺ خير محمد سمون، تعلقي بلڙي شاهه ڪريم، ضلعي ٽنڊي محمد خان ۾ ٿيو. 1973ع ۾ تعليم کاتي ۾ استاد مقرر ٿيو. هن ايم.اي (سنڌي)، بي ايڊ ۽ ايم ايڊ پاس ڪرڻ کانپوءِ ڪراچي يونيورسٽيءَ مان. ڊاڪٽرنوازعلي شوق جي نگرانيءَ ۾ ”شاهه لطيف جي ڪلام ۾ مرد جو ڪردار“ جي عنوان تي 2009ع ۾ پي ايڇ ڊي ڪئي. لطيفيات ۽ تاريخ تي تحقيقي ڪم سندس خاص مشغلو هو. 85-1984ع ۾ شاهه ڪريم بلڙيءَ مان سندس سرپرستيءَ ۾ ”بسنت پبليڪيشن“ ۽ 1993ع ڌاري ”ڪوڪ“ جي نالي سان رسالا جاري ٿيا، مارئي تنظيم طرفان (شاهه سچل ۽ سامي انٽرنيشنل ڪانفرنس دهلي) ۾ سنڌ جي اديبن جي وفد سان هند جي سفرڪرڻ کان پوءِ 2014ع ۾حج جي سعادت حاصل ڪئي. سندس ڇپيل ڪتابن ۾: ’ٽنڊي محمد خان ضلعي جو سماجي اڀياس‘ (درجو ٽيون. سنڌ ٽيڪسٽ بوڪ بورڊ ڄام شورو 2006ع)، ”شاهه لطيف جي ڪلام ۾ مرد جو ڪردار“، (لطيفيات: 2011ع)، ’اندر تون اجار‘ (لطيفيات: 2017ع)، ’راحت القلوب‘ (ترجمو: 2015ع)، ’انيس العاشقين‘ (مولانا محمد نورنگزادي جو حج جو سفرنامو، تحقيق ۽ ترتيب: 2016ع)، ’بسم جون برڪتون‘ (2021ع)، ’شاهه جي ڪلام ۾ حيوانات، جمادات ۽ نباتات جو ذڪر“ (تحقيق: 2021ع)، ”ڪا جا روح رهاڻ“ (سوانحي خاڪا، مضمون) ۽ ”رولاڪ راهون“ (آتم ڪٿا) شامل آهن. ڊاڪٽر محمد ابراهيم سنڌيءَ جي ذاتي لائبرري ۾ ڪتابن جو وڏو ذخيرو ۽ موسيقيءَ جو خزانو(آڊيو۽ وڊيو) موجود آهي. هن 6 اپريل 2024ع تي وفات ڪئي.

داخلا ۾ استعمال ٿيل تاريخون

1953.11.05  عيسوي

ڊاڪٽرمحمد ابراهيم سنڌيءَ جوجنم 5 نومبر 1953ع تي ڳوٺ خير محمد سمون، تعلقي بلڙي شاهه ڪريم، ضلعي ٽنڊي محمد خان ۾ ٿيو.

اديب - ڀاڱي جون ٻِيون داخلائون