ڪمال اتاترڪ

اتا ترڪ ڪمال: جديد ترڪيءَ جو باني ڪمال اتا ترڪ، جنهن ترڪيءَ ۾ سيڪيولر نظام رائج ڪيو ۽ ترڪيءَ جو پهريون صدر بہ ٿيو. ڪمال اتا ترڪ جو اصلي نالو غازي مصطفيٰ ڪمال هو. هن جي والد جو نالو علي رضا آفندي هو جيڪو ترڪ فوج ۾ هوندو هو، ۽ هو 1881ع ۾ ترڪيءَ جي سالونيڪا صوبي ۾ ڄائو هو. ابتدائي تعليم حاصل ڪرڻ کان پوءِ پاڻ بہ فوج ۾ نوڪري ڪيائين. هن کي شروع کان ملڪ جي سياسي معاملن ۾ دلچسپي هئي. سلطان عبدالحميد جي حڪومت خلاف باغيانه سرگرمين ۾ حصو وٺڻ جي ڪري جيل بہ ڪاٽيائين. ان کان پوءِ اناطوليا ۾ قوم پرست جماعتن ۽ فوج کي منظم ڪري ملڪ مان پراڻي حڪومتي نظام کي ختم ڪرڻ جو عزم ڪيائين، فوج ۾ ترقي ڪندو 1916ع ۾ جرنل جي عهدي تي پهتو. پهرين عالمي جنگ جي خاتمي تي ترڪيءَ جي سلطان وحيدالدين، مصطفيٰ ڪمال کي ترقي ڏني. 1920ع ۾ انگورا ۾ ترڪيءَ جي پهرين اسيمبليءَ جو صدر چونڊيو. 1921ع کان 1922ع ڌاري يونانين کي اناطوليا مان نيڪالي ڏيارڻ تي کيس ”غازي پاشا“ جو لقب مليو. 1923ع ۾ ترڪيءَ مان عثماني خلافت جي خاتمي جو اعلان ڪيائين ۽ ترڪيءَ ۾ جمهوريت جو اعلان ڪيائين ۽ ائين پاڻ ترڪيءَ جو صدر بڻيو ۽ عصمت پاشا وزيراعظم. 1934ع ۾ ترڪ قوم کيس اتاترڪ جو لقب ڏنو جنهن جي معنيَ آهي ”ترڪ قوم جو ابو “ هن جي دور حڪومت ۾ هن ترڪي ٻوليءَ کي عربي رسم الخط جي جاءِ تي رومن رسم الخط ڏنو، قرآن شريف کي پڻ عربي ٻوليءَ بدران ترڪيءَ ۾ رائج ڪيائين. نماز ۾ خطبو بہ عربيءَ بدران ترڪيءَ ۾ ڏيڻ جو حڪم ڪيائين. هجري سن بدران عيسوي سن رائج ڪيائين. ائين هن ترڪي قوم پرستيءَ کي رواج ۾ آندو. ڪمال اتا ترڪ 1938ع ۾ وفات ڪئي.

داخلا ۾ استعمال ٿيل تاريخون

1881.00.00  عيسوي

۽ هو 1881ع ۾ ترڪيءَ جي سالونيڪا صوبي ۾ ڄائو هو .

1938.00.00  عيسوي

ڪمال اتا ترڪ 1938ع ۾ وفات ڪئي .

شخصيتون - ڀاڱي جون ٻِيون داخلائون