اثناعشري: اهل تشيع جي اُها شاخ، جيڪا اسماعيليه يا سبعيه جي برعڪس هن ڳالھہ جي قائل آهي تہ امامت ستين امام تي ختم نٿي ٿئي، بلڪ ٻين امامن ڏانهن منتقل ٿيندي رهي ٿي. هن فرقي موجب امام ٻارهن آهن، جيڪي معصوم ۽ ﷲ جي طرفان مامور ٿيل آهن. انهن جو تفصيل هن طرح آهي: (1) حضرت علي ابن ابي طالب عليہ السلام، (2) حضرت حسن بن علي عليہ السلام، (3) حضرت حسين بن علي عليہ السلام، (4) حضرت علي بن حسين (امام زين العابدين) عليہ السلام ، (5) حضرت محمد بن علي (امام باقر) عليہ السلام، (6) حضرت جعفر بن محمد (امام جعفر صادق) عليہ السلام، (7) حضرت موسيٰ بن جعفر (امام موسيٰ ڪاظم) عليہ السلام، (8) حضرت علي بن موسيٰ (امام علي رضا) عليہ السلام، (9) حضرت محمد بن علي (امام محمد تقي) عليہ السلام، (10) حضرت علي بن محمد (امام علي نقي) عليہ السلام، (11) حضرت حسن بن علي (امام حسن عسڪري) عليہ السلام، (12) حضرت مهدي منتظر (امام قائم) عليہ السلام.