ارباب الهجڙيو

ارباب الھجڙيو: ارباب حاجي الھجڙيو نهڙيو 1862ع ۾ ارباب مٺا خان جي گهر ۾ ڳوٺ کيتلاري تعلقي ڏيپلي ضلعي ٿرپارڪر ۾ جنم ورتو. سياست جي شروعات 1895ع کان شروع ڪيائين. سياسي ميدان ۾ مسلم ليگ سان ساٿ ڏئي اڳتي وڌيو. تحريڪ خلافت ۾ حصي وٺڻ کان سواءِ علامہ مشرقي جي 1931ع ۾ قائم ڪيل خاڪسار تحريڪ ۾ مير علي احمد ٽالپر ۽ مير رسول بخش ٽالپر سان گڏ حصو ورتائين. آزاديءَ جي تحريڪ دوران ارباب خانصاحب توڳاچي ۽ تاج محمد'>ارباب تاج محمد جو ٻانهن ٻيلي رهيو. لوڪل بورڊ جو ميمبر بہ رهيو، کيس جڏهن سياست ۾ ڪوڙ ۽ ٺڳي نظر اچڻ لڳس تہ سياست کي خيرآباد چئي ﷲ جي اطاعت، عبادت ۽ رياضت ۾ مشغول ٿي انسانيت جي خدمت ڪرڻ لڳو. اسلامي، ديني ۽ علمي معلومات جي اشاعت ۽ جھالت کي ختم ڪرڻ لاءِ 1929ع ۾ ستار آباد ۾ ”مظهر العلوم“ نالي سان هڪ وڏو ديني مدرسو قائم ڪرايائين، جنهن مان سوين شاگرد عربي، فارسي ۽ قرآن شريف جي تعليم حاصل ڪري چڪا آهن. انهيءَ مدرسي جو خرچ هي سخي مرد برداشت ڪندو هو. عالمن ۽ فاضلن سان روحاني ڪچهريون ڪري انهن مان فيض ۽ ذهني سڪون حاصل ڪندو هو. سندس زندگيءَ جو وڏي ۾ وڏو ڪارنامو، مولوي حاجي احمد ملاح جو سنڌي ٻوليءَ ۾ قرآن مجيد جو منظوم ترجمو پنھنجي خرچ تي ڇپائي، سنڌ جي عوام ۾ مفت تقسيم ڪرڻ هو. ٿر جو عوام سندس ديني، مذهبي ۽ سماجي خدمتون ڪڏهن بہ وساري نہ ٿو سگهي. پاڻ 20 آگسٽ 1988ع ۾ هن فاني دنيا مان رحلت ڪري ويو. سندس آخري آرامگاھہ ٿرپارڪر ضلعي جي ڏيپلي تعلقي ۾ سندس اباڻي ڳوٺ کيتلاريءَ ڀرسان کيتلاري قبرستان ۾ واقع آهي.

داخلا ۾ استعمال ٿيل تاريخون

1862.00.00  عيسوي

ارباب الهجڙيو: ارباب حاجي الهجڙيو نهڙيو 1862ع ۾ ارباب مٺا خان جي گهر ۾ ڳوٺ کيتلاري تعلقي ڏيپلي ضلعي ٿرپارڪر ۾ جنم ورتو

1988.08.20  عيسوي

ارباب الهجڙيو: پاڻ 20 آگسٽ 1988ع ۾ هن فاني دنيا مان رحلت ڪري ويو .

شخصيتون - ڀاڱي جون ٻِيون داخلائون