ارشاد علي شاهه
ارشاد علي شاهه
ارشاد علي شاهه: سنڌ پبلڪ سروس ڪميشن جو اڳوڻو چيئرمئن، سيد ارشاد علي شاهه ولد سيد خير محمد شاهه، ڳوٺ وهاب شاهه، ضلعي حيدرآباد (هاڻي مٽياري) ۾، پھرين جنوري 1950ع تي پيدا ٿيو. هن جو ڪاظمي سيد ۽ مٽياروي ساداتن جي جرارپوٽا خاندان سان تعلق هو. پرائمري تعليم پنھنجي ڳوٺ مان، ثانوي تعليم مڊل اسڪول مير حسن مريءَ مان ۽ مئٽرڪ شاهه عبداللطيف هاءِ اسڪول ٽنڊي آدم مان ڪئي. ان بعد مسلم ڪاليج حيدرآباد مان بي. اي ۽ سنڌ لا ڪاليج حيدرآباد مان ايل ايل بي ڪري حيدرآباد جي نامياري وڪيل حسن محمود بيگ سان گڏجي وڪالت جي شروعات ڪئي. ان کان اڳ ڪجهه وقت ڪلرڪ رهيو ۽ يونين ڪائونسل جو، سيڪريٽري به رهيو. وڪالت دوران سنڌ پبلڪ سروس ڪميشن مان سول جج ۽ فرسٽ ڪلاس مئجسٽريٽ جو امتحان پاس ڪري، سنڌ جي عدليه ۾ 1976ع ۾ شامل ٿيو. سيد ارشاد علي شاهه ڪنڌڪوٽ، سيوهڻ ۽ ميرپورخاص ۾ سول جج ۽ فرسٽ ڪلاس مئجسٽريٽ به ٿي رهيو. ان بعد سينئر سول جج ۽ اسسٽنٽ سيشن جج جي حيثيت ۾ پروموشن وٺي سانگهڙ ۽ ڪراچيءَ ۾ خدمتون انجام ڏنيون. سيد ارشاد علي شاهه 1988ع ۾ ايڊيشنل ڊسٽرڪٽ ۽ سيشن جج جي عھدي تي ترقي وٺي شڪارپور، نواب شاهه ۽ ڪراچيءَ ۾ ملازمت ڪئي. 1994ع ۾ سنڌ هاءِ ڪورٽ ۾ ايڊيشنل رجسٽرار (ايڊمنسٽريشن) جي عھدي تي مقرر ٿيو ۽ اتان 1995ع ۾ ڊسٽرڪٽ ۽ سيشن جج جي عھدي تي ترقي وٺي ڊسٽرڪٽ ۽ سيشن جج ڪراچي سائوٿ، دادو، لاڙڪاڻو ۽ نواب شاهه ٿي رهيو. پاڻ جج بينڪنگ ڪورٽ ڪراچي، اسپيشل جج اينٽي ڪرپشن لاڙڪاڻو ۽ حيدرآباد ۽ پرزائيڊنگ آفيسر ليبر ڪورٽ لاڙڪاڻو، حيدرآباد ۽ ڪراچي به رهيو. ارشاد علي شاهه 2010ع ۾ سنڌ جي عدليه مان ڊسٽرڪٽ ۽ سيشن جج جي عھدي تان رٽائرڊ ٿيو. ان بعد چيئرمئن انڪروچمينٽ ٽريبيونل حيدرآباد ۾ ڪجهه وقت لاءِ خدمتون انجام ڏنيون. ان کانسواءِ جنوري 2011ع کان هو چيئرمئن سنڌ پبلڪ سروس ڪميشن حيدآباد جي عھدي تي پڻ مقرر ٿيو ۽ ان حيثيت ۾ سنڌي لئنگئيج اٿارٽيءَ جي بورڊ آف گورنرس جو ميمبر پڻ رهيو. سيد ارشاد علي شاهه شاگرديءَ واري دؤر کان سماجي ۽ ادبي تنظيمن ۾ جاکوڙيندو رهيو. ڪيترين تنظيمن جو عھديدار رهيو ۽ حيدرآباد ڊسٽرڪٽ بار جو جوائنٽ سيڪريٽري پڻ رهيو. هڪ شاعر جي حيثيت ۾ ڪيترن ئي فنڪارن سندس ڪلام ڳايو آهي. ان کانسواءِ هو نجوم، رمل، جفر ۽ راڳ جي علم ۾ به چڱي ڄاڻ رکندو هو. سندس علم نجوم تي هڪ ڪتاب ’روشنيءَ جون رمزون‘ (2006ع) ڇپجي چڪو آهي، جنھن ۾ ڪواڪبن، چنڊ ۽ ڪھڪشائن جي حرڪت ۽ اثرن جو ذڪر، برجن جا درجا ۽ ان ۾ ڪواڪب علويات، سفليات، انھن جو حجم، فاصلو، مدار رفتار ۽ ڪواڪبن جي مختلف برجن ۾ حالت شرف، اوج ۽ بال، هبوط ۽ خفيف جو بيان ٿيل آهي. 18 نومبر 2020ع تي ضلعي مٽياريءَ ۾ وفات ڪئي.
لفظ ارشاد علي شاههھيٺين داخلائن ۾ پڻ استعمال ٿيل آھي
داخلا ۾ استعمال ٿيل تاريخون
1950.01.01 عيسوي
سنڌ پبلڪ سروس ڪميشن جو اڳوڻو چيئرمئن، سيد ارشاد علي شاهه ولد سيد خير محمد شاهه، ڳوٺ وهاب شاهه، ضلعي حيدرآباد (هاڻي مٽياري) ۾، پهرين جنوري 1950ع تي پيدا ٿيو.
شخصيتون - ڀاڱي جون ٻِيون داخلائون
صبغت الله انڍڙ ڊاڪٽرثمينه وقار
زرداري سائينداد خان
چاچڙ علي مردان خان
صالح حاجاڻو
ٽهلراماڻي آنند
الطاف قادري
راجڪمار هيراڻي
دودو سومرو
شيخ محمد رضا