ڊاڪٽرارشاد ڪاظمي

ارشاد ڪاظمي، ڊاڪٽر: ليکڪ، شاعر ۽ مترجم ڊاڪٽر سيد ارشاد حسين ڪاظمي ولدسيد ڪوڙل شاهه ڪاظمي جو جنم 25 سيپٽمبر 1967ع تي ڪوٽڙي ڪبير، تعلقي محرابپور، ضلعي نوشھري فيروز ۾ ٿيو. سندس تعليم ايم بي بي ايس (لياقت مئڊيڪل ڪاليج، ڄامشورو) ۽ پوسٽ گريجوئيشن (2014ع ۾ ڊائو يونيورسٽي آف ھيلٿ سائنسز، ڪراچي) آهي، ان کانسواءِ ھن طبي ميدان ۾ 25 کان مٿي فني تعليم ۽ سکيا تي مبني ڪورس پڻ مڪمل ڪيا، جن ۾: ڊزيز سويئلنس، مئنجمينٽ انفرميشن سسٽم (MIS)، وئڪسين لاجسٽڪس مئنيجمينٽ انفارميشن سسٽم (VLMIS) ڪونٽراسيپٽو لاجسٽڪس مئنجمينٽ انفرميشن سسٽم (CLMIS)، وبائي بيمارين کان حفاظت، روڪٿام ۽ دفاعي سگهه جي واڌاري (IPC)، پروڪيورمينٽ ۽ مانيٽرنگ جا موضوع شامل آھن.ھن لکڻ جي شروعات 1982ع کان ڪئي. نظم، نثري نظم، غزل ٽيڙو، ڪالم، افساني/ ڪھاڻي ۽ سفرنامي تي طبعزاد لکڻين کانسواءِ ترجماپڻ ڪيا اٿس. سندس لکڻيون سنجها، پروڙ، عبرت مئگزين، مھراڻ، سرتيون، پرک، افيئر، نيوز مئگزين، عوامي آواز، خادم وطن سميت مختلف اخبارن ۽ رسالن ۾ ڇپيون آهن. سندس ٻه ڪتاب: ”ساحلن تي آوارگيون“ (شاعري- 2012ع) ۽ ”منھنجو ديس جھان “ (سفرنامو: 2021ع) ڇپيل آھن.1993ع کان صحت کاتي، سنڌ ۾ ميڊيڪل آفيسر طور ڪم ڪري رھيو آھي. صحت جي ميدان ۾ بنا امتيازخدمتن عيوض کيس ورلڊ ھيلٿ آرگنائيزيشن، يونيسيف، صوبائي ۽ قومي صحت جي ادارن/ وزارتن پاران مڃتا شيلڊون ۽ اوارڊ ڏنا ويا آھن. پاڻ 2022ع ۾ ڪئناڊا ۾ ٿيل بين الاقوامي ايڊز ڪانفرنس ۾ پاڪستاني وفد جو حصو رھيو.2012ع ۾ سريلنڪا ۾ رٿيل ورڪشاپ ”رئبيز (Rabies) جي خاتمي لاءِ ڪتن جي آباديءَ جي مؤثر انتظام جو ڪردار“ ۾ پڻ شريڪ رھيو. ان کانسواءِ ٿائيلئنڊ، ڪمبوڊيا، ملائيشيا، ايران، گڏيل عرب امارات، آذربائيجان ۽ ترڪي وغيره ۾ به ڪيترن ئي ورڪشاپن، سيمينارن ۾ شرڪت ڪري چڪو آھي.

داخلا ۾ استعمال ٿيل تاريخون

1967.09.25  عيسوي

ليکڪ، شاعر ۽ مترجم ڊاڪٽر سيد ارشاد حسين ڪاظمي ولدسيد ڪوڙل شاهه ڪاظمي جو جنم 25 سيپٽمبر 1967ع تي ڪوٽڙي ڪبير، تعلقي محرابپور، ضلعي نوشھري فيروز ۾ ٿيو.

شاعر - ڀاڱي جون ٻِيون داخلائون