اسدالله شاھہ فدا ٽکڙائي حڪيم: علامہ حڪيم قاضي اسدالله شاھہ ولد سيد الھہ بخش شاھہ ٽکڙائي 15 شعبان 1285ھہ/30 نومبر 1868ع ڌاري، ٽکڙ ضلعي ٽنڊي محمد خان ۾ ڄائو. سندس تعلق مٽيارين واري سيد خاندان جي جراڙ پوٽي پاڙي جي منعماڻي شاخ سان هو. ابتدائي تعليم استاد حافظ يوسف وٽان حاصل ڪيائين، جنهن وٽ سنڌي فارسي ۽ فقہ پڙهڻ کان سواءِ نَون مهينن جي عرصي ۾ قرآن شريف حفظ ڪيائين. وڌيڪ تعليم پنھنجي مرشد خواجہ عبدالرحمان ۽ حيدرآباد ۾ مولوي محمد حسن وٽ حاصل ڪيائين، بعد ۾ مائٽن کي ٻڌائڻ کان سواءِ ديوبند ويو ۽ شيخ الهند مولانا محمودالحسن وٽ علم جي تحصيل ڪيائين. طب جو علم، ميران محمد شاھہ اول وٽان سکيو. ٽکڙ ۾ سندس عاليشان دواخانو هو ۽ پنھنجي وقت جو حاذق حڪيم سمجهيو ويندو هو. سنڌ ۾ خلافت تحريڪ جو باني هو. نورمحمد وڪيل، عبدالجبار شيخ، شيخ عبدالمجيد سنڌيءَ ۽ پير غلام مجدد سرهنديءَ جھڙا مخلص ماڻهو سندس ڪارڪن هئا. سندس عام فيض کي ڏسي مسلمانن کيس حيدرآباد جو قاضي مقرر ڪيو. پاڻ سٺو نثر نويس، اديب نقاد ۽ قادرالڪلام شاعر هو. کيس حافظ حامد، محمد هاشم مخلص، غلام محمد شاھہ ”گدا“ جي صحبت ۾ شاعريءَ جو شوق جاڳيو. شاعريءَ ۾ ”فدا“ تخلص استعمال ڪندو هو. حج جي سعادت بہ ماڻيائين. پاڻ هڪ ئي وقت حافظ، عالم، شاعر، مصنف ۽ سياستدان هو. سنڌ جي هن قومي ڪارڪن، اديب، شاعر ۽ صحافيءَ 10 فيبوري 1926ع/ 27 رجب 1344ھہ تي وفات ڪئي.
1868.10.30 عيسوي
اسدالله شاهه ٽکڙائي 15 شعبان 1285هه/30 نومبر 1868ع ڌاري، ٽکڙ ضلعي ٽنڊي محمد خان ۾ ڄائو
1962.02.10 عيسوي
اسدالله شاهه ٽکڙائي 10 فيبروري 1926ع/ 27 رجب 1344هه تي وفات ڪئي