داخلا نمبر	1759
عنوان	امام بخاري
شاخ	شخصيتون
پڙهيو ويو	2628 ڀيرا
داخلا جو حوالو	انسائيڪلوپيڊيا سنڌيانا جلد پهريون

امام بخاريءَ جو مقبرو

امام بخاري

امام بخاري رحه: سندس پورو نالو محمد بن اسماعيل ابو عبدالله الجوفي هو. هو 194ھہ/810ع ڌاري بخارا ۾ پيدا ٿيو. اڃا 17 سالن جي عمر جو هو تہ ماءُ سان گڏ حج ڪرڻ لاءِ سعودي عرب ويو، جتي علم پرائڻ لاءِ رهي پيو. 18 سالن جي ڄمار ۾ ڪتاب ”قضاياءِ صحابہ وتابعين“ لکيائين. کيس تاريخ ۽ حديث سان ڏاڍو لڳاءُ هو. ان اڃ اجهائڻ لاءِ مديني پاڪ ويو. پاڻ ڪريم صلي ﷲ عليہ وسلم جن جي مقبري وٽ ويهي ”تاريخ ڪبير“ لکيائين. سندس وڏو ڪم ۽ وڏو مقصد حديثون گڏ ڪرڻ هو، ان لاءِ ڪيترن ئي هنڌن جو سفر ڪيائين. اٽڪل اسي هزار اهڙن ماڻهن سان مليو، جن وٽ حديثون هيون. ذري گهٽ ڇھہ لک حديثون گڏ ڪيائين، جن مان ڪي مستند هيون تہ ڪي غير مستند. انهيءَ ڪم کان واندو ٿيو تہ حديث نگاريءَ جو اهم ڪتاب لکڻ ويٺو. ان ۾ ڇھہ هزار حديثون لکيائين ۽ اهو ڪتاب پوريءَ دنيا ۾ ”صحيح بخاريءَ“ جي نالي سان مشھور آهي.
امام بخاري ”صحيح بخاري“ لکڻ ۾ 18 سال لڳايا. هيءُ ڪتاب اسلامي دنيا ۾ تمام گهڻي عزت سان پڙهيو وڃي ٿو. صحيح بخاريءَ کان سواءِ پاڻ ادب ۽ فقہ وغيرہ تي اٽڪل 12 ڪتاب ٻيا بہ لکيائين. 256ھہ/870ع ۾ وفات ڪري ويو .