امام بخش ’خادم ‘:امام بخش ”خادم“ سنڌي غزل جو مشھور شاعر ٿي گذريو آهي، جيڪو 1861ع ۾ محمد بچل بدويءَ جي گهر، شڪارپور ۾ پيدا ٿيو. ماءُ جي فوت ٿي وڃڻ ڪري سندس پالنا ناناڻن ڪئي. 1869ع ۾ آخوند قمرالدين جي مدرسي ۾ سنڌي پڙهڻ ويٺو. 1873ع ۾ پنج درجا پاس ڪري، سنڌي فائنل ڏنائين. ان کان پوءِ انگريزيءَ جا ٽي درجا پڙهي، ٽريننگ ڪاليج، حيدرآباد ۾ داخلا ورتائين، جتان 1879ع ۾ سرٽيفڪيٽ ورتائين ۽ حيدرآباد جي ئي هڪ اسڪول ۾ استاد مقرر ٿيو. اتي ئي سندس ملاقات سنڌ جي مشھور شاعرن، سيد فاضل شاھہ، فضل محمد ”ماتم“ ۽ خليفي محمد قاسم هالائيءَ سان ٿي. شاعريءَ جو شوق اڳ ۾ ئي هئس، ويتر سٺي سنگت جي ڪري وڏن شاعرن ۾ شمار ٿيڻ لڳو. 1880ع ۾ شڪارپور بدلي ٿي ويو، جتي اسڪول جو هيڊماستر ٿيو. 1886ع ۾ سکر بدلي ٿي ويو. 1896ع ۾ ئي ڪٽنب سوڌو حج ڪيائين. ان کان پوءِ مختلف هنڌن تي پنھنجي پيشي سان نباھہ ڪيائين. 1912ع ۾ استعيفيٰ ڏيئي، لکڻ پڙهڻ ۾ مشغول ٿي ويو. هن ’هير رانجهو‘ ڊرامو، ’حاتم طائيءَ جو قصو‘، ’چار درويش‘، ’بھرام گور‘، ’انشاءِ خادم‘، ’الف ليليٰ‘، ’فوائدالمبتدي‘ (فارسيءَ ۾)، ’نانگ وارو معجزو‘ (نظم ۾)، ’مثنوي نگار‘، ’دودو چنيسر‘ ۽ ’ڪليات خادم‘ ڪتاب لکيا. سندس ڪلام ’بھار اخلاق‘، ’تحفه احباب‘ ’آفتاب‘، ۽ ’سنڌ سڌار‘ جهڙن رسالن ۾ شايع ٿيو. مشھور شاعر ۽ اديب، لطف ﷲ بدوي سندس فرزند هو. حاجي امام بخش ’خادم‘، جنوري 1336ھہ/1918ع ۾ وفات ڪئي.
1861.00.00 عيسوي
امام بخش ’خادم‘ 1861ع ۾ شڪارپور ۾ پيدا ٿيو
1918.00.00 عيسوي
امام بخش ’خادم‘ 1918ع ۾ وفات ڪئي