ڊاڪٽر انور عالماڻي

انور عالماڻي، ڊاڪٽر: اديب ۽ سماجي ورڪر ڊاڪٽر انور عالماڻي ولد ڪريم بخش عالماڻيءَ جو جنم 15 آڪٽوبر 1948ع تي، ڳوٺ سونو خان عالماڻي، تعلقي ۽ ضلعي حيدرآباد ۾ ٿيو. ابتدائي تعليم ڳوٺ جي پرائمري اسڪول مان حاصل ڪرڻ کانپوءِ وڌيڪ تعليم حمايت الاسلام ۽ پبلڪ اسڪول حيدرآباد مان حاصل ڪئي. 1964ع ۾ ڊاڪٽريءَ جي تعليم لاءِ لياقت ميڊيڪل ڪاليج ڄام شوري ۾ داخلا ورتي. 1972ع ۾ MBBS جي ڊگري مڪمل ڪري ۽ 1974ع ۾ صحت کاتي ۾ ميڊيڪل آفيسر مقرر ٿيو. سرڪاري ملازمت کي سال جي اندر الوداع ڪري، ٽنڊي محمد خان ۾ پنھنجي خانگي اسپتال قائم ڪئي. 1985ع ۾ پنھنجي والده جي نالي سان ٽنڊي محمد خان ۾ خيراتي اسپتال قائم ڪئي. سماجي ڪارڪن جي حيثيت ۾ 1986ع ۾ دارالعلوم هاءِ اسڪول (ٽنڊو محمد خان) ۽ 1992ع ۾ مخدوم بلاول سائنس ڪاليج (ٽنڊو محمد خان) قائم ڪيا. ان کان علاوه ڳوٺ ۾ والد جي نالي سان هلندڙ ’ڪريم بخش عالماڻي ووڪيشنل اسڪول‘ جو پاڻ نگران رهيو. لکڻ جي شروعات 1961ع ۾ روزاني ’عبرت‘ ۽ ٻين اخبارن کان ڪئي. سندس ڇپيل ڪتابن ۾: ’مذهب ۽ ماڻهو‘، ’انقلاب ڇو‘، ’سچ جو سڏ‘، ’جيئڻ جو حقدار ڪير؟‘، ’ساڻيھه جا سنيھا‘ (علامه آءِ آءِ قاضيءَ جا ليڪچر: ترتيب)، ’رهگذر‘ (ڪالم)، ’دوزخ جو مسافر‘ (ڪھاڻيون)، ’قرآن جي پڪار‘، ’خدا ۽ سرمائيدار‘، ’سرجيس تان سور‘ (آتم ڪٿا)، ’ڏات جو ڏنگ‘،’Islam is the religion of peace‘، ’Visionary Tales of Indus Valley‘ ۽ ’Quran is the message of Peace‘ شامل آهن. ادبي خدمتن جي مڃتا طور کيس ڪيترائي اوارڊ مليا. ڊاڪٽر انور عالماڻي کي 26 اپريل 2025ع تي قتل ڪيو ويو.

داخلا ۾ استعمال ٿيل تاريخون

1948.10.15  عيسوي

اديب ۽ سماجي ورڪر ڊاڪٽر انور عالماڻي ولد ڪريم بخش عالماڻيءَ جو جنم 15 آڪٽوبر 1948ع تي، ڳوٺ سونو خان عالماڻي، تعلقي ۽ ضلعي حيدرآباد ۾ ٿيو.

شخصيتون - ڀاڱي جون ٻِيون داخلائون