انيلا سُندر
انيلا سندر
انيلا سُندر: مشھور سنڌي ڪلاسيڪل ڊانسر انيلا سندر جو جنم 11 نومبر 1951ع تي الھاس نگر، مھاراشٽرا (هندستان) ۾ ٿيو. سندس پيءُ گوبند ماکيجاڻي ۽ ماءُ نانڪي ماکيجاڻي ڊاڪٽري پيشي سان سلھاڙيل رهيا. انيلا سندر ممبئي يونيورسٽي مان ڪلينيڪل سائيڪالاجيءَ ۾ ماسٽرز جي ڊگري حاصل ڪئي ۽ ڪجهه وقت جئه هند ڪاليج، ممبئي ۾ بطور ليڪچرر پڙهايو. ننڍپڻ کان ڪلاسيڪل ڊانس ۾ دلچسپي هئڻ سبب استادي پيشي کي خيرباد چئي ڪُل وقتي فنڪاره/ڪٿڪ ڊانسر بڻجي وئي. يارهن سالن جي عمر ۾ هن پرياگ سنگيت ساميتي، الله آباد مان ڪٿڪ ڊانس جي باقاعده سکيا ورتي. پاڻ، گذريل پنجويھه سالن کان هندستان توڙي پرڏيھه ۾ سنڌي ناٽڪي ناچ (ڪٿڪ ڊانس) سان گڏ ڊائريڪٽر ۽ ڪوريوگرافر جا فرض پڻ انجام ڏئي رهي آهي.سندس ڪجهه مشھور البم هن ريت آهن: سڪ سڄڻ جي، سنڌيت جي سرهاڻ (سنڌين جا تھوار)، ٿيءُ نه جدا جاني مون کان، سنڌو (موهن جي دڙي جي تھذيب)،گيت گووند، سنڌ منھنجي امان، (سنڌ جي تاريخ)، زال-ڪڏهن زير، ڪڏهن زبر (عورتن جي زندگيءَ جي مختلف پھلوئن تي مبني).
1971ع ۾ کيس جاپاني حڪومت طرفان ’يوٿ ائڪسچينج پروگرام‘ ۾ شرڪت لاءِ خاص دعوت ڏني وئي، جتي هن ’ The Land of the Rising Sun‘ تي پھريون ڀيرو ملڪ کان ٻاهر پنھنجي فن جو مظاهرو ڪيو. 1975ع ۾ هن اولهه آفريڪا ۽ لنڊن ۾ ٽي وي توڙي اسٽيج تي ڪيترائي ڀيرا پنهنجي فن جو مظاهرو ڪيو. نائيجيريا جي انسٽيٽيوٽ آف نيشنل افيئر، انڊين ليڊيز ڪلب ۽ انڊين ايسوسيئيشن جي پروگرامن ۾ شرڪت ڪري فن پيش ڪيو. 1977ع ۾ تھران جي هڪ ميلي ۾ پنھنجي فن جو مظاهرو ڪيو، جتان کيس عالمي سطح تي شھرت ملي.
انيلا سندر، هن وقت تائين فلپائن، هانگ ڪانگ، گڏيل عرب امارات، اوسلو، اسٽاڪ هوم، ڪوپنھيگن، ائمسٽرڊم ۽ لئگزمبرگ سميت هندستان جي 25 کان وڌيڪ شھرن ۾ پنھنجو فن پيش ڪري چڪي آهي،کيس سندس خدمتن جي اعتراف ۾ ’سنڌي ٻولي ۽ ساهت سڀا'>اکل ڀارت سنڌي ٻولي ۽ ساهت سڀا‘ طرفان ’بھترين فنڪاره‘ جو اوارڊ (1994ع)، انٽرنيشنل سنڌي پنچائت فيڊريشن طرفان ’جهولي لعل اوارڊ‘ (1990ع) ۽ روٽري ڪلب طرفان ووڪيشنل ائڪسيلينس اوارڊ (1999ع) سان نوازيو ويو. هن سندر نچناڻيءَ سان شادي ڪئي، جنھن مان کيس، هڪ ڌيءَ ’رچنا‘ جو اولاد آهي ۽ هن وقت پنھنجي ڪٽنب سان گڏ هندستان ۾ رهائش پذير آهي.
لفظ انيلا سندرھيٺين داخلائن ۾ پڻ استعمال ٿيل آھي
داخلا ۾ استعمال ٿيل تاريخون
1951.11.11 عيسوي
مشھور سنڌي ڪلاسيڪل ڊانسر انيلا سندر جو جنم 11 نومبر 1951ع تي الھاس نگر، مھاراشٽرا (هندستان) ۾ ٿيو.
شخصيتون - ڀاڱي جون ٻِيون داخلائون
عبدالرحمان پيرزادو ميانترخان مرزا غازي بيگ
سعيد سميجو
سڀاش چندر بوس
ڏيارام گدو مل
ربنواز ٽانوري
حنيف جلال
الياس عليه السلام
ٽهل ايسرداس ڪيسواڻي
بئريسٽر عبدالرحمان