اٻوجهو، الهه بخش: سنڌي ٻوليءَ جو مشهور شاعر ۽ سماج سڌارڪ جنهن 1848ع ۾ جنم ورتو. هن جي ”مسدس اٻوجهو“ مولانا حاليءَ جي مشهور ”مسدس حالي“ جي طرز تي لکيل آهي. جنهن ۾ مسلمانن جي حالت جو نقشو چٽيو اٿس. هن سنڌ جي مسلمانن ۾ تعليمي، سياسي ۽ سماجي شعور اجاگر ڪرڻ لاءِ گهڻيون ڪوششون ڪيون ۽ سنڌ مدرسة الاسلام جي قيام لاءِ مرحوم حسن علي آفنديءَ سان گڏجي ڪوششون ڪيائين، اُتي فارسيءَ جو استاد به ٿي رهيو. ان زماني ۾ هن هفتيوار ”معاون“ اخبار به جاري ڪئي. سنڌي ڇوڪرين لاءِ ڪراچيءَ ۾ ڌار انگريزي اسڪول قائم ڪرايائين. سندس هڪ نياڻي شاه بيبي ايم. اي ڪئي، تعليم جي شعبي سان وابسته رهي ۽ سالن جا سال ريڊيو پاڪستان ڪراچيءَ تان سنڌيءَ ۾ خبرون پڙهندي هئي، سندس ٻي ڌيءَ بلقيس اسلام آباد ۾ تعليم واري وزارت ۾ آفيسر هئي ۽ اتان سنڌي خبرون پڙهندي هئي، سندس ٽين ڌيءَ گل بيبي اين. جي. وي اسڪول ڪراچيءَ جي پرنسپال رهي، اهڙيءَ طرح الهه بخش اٻوجهو نه صرف عام سنڌي مسلمانن لاءِ پر سنڌي نياڻين لاءِ تعليم جي ميدان ۾ مثالي خدمتون سرانجام ڏنيون. هي سنڌي ٻوليءَ ۾ قومي شاعريءَ جي بانين مان هو، جنهن ”مسدس حالي“ جي طرز تي سنڌيءَ ۾ ”مسدس اٻوجهو“ لکيو. هن 1901ع ۾ وفات ڪئي. سندس مسدس جو ڳچ حصو مسدس حاليءَ جو ترجمو آهي.
1848.00.00 عيسوي
اٻوجهو ، الهه بخش: سنڌي ٻوليءَ جو مشهور شاعر ۽ سماج سڌارڪ جنهن 1848ع ۾ جنم ورتو
1901.00.00 عيسوي
اٻوجهو الهه بخش، هن 1901ع ۾ وفات ڪئي