بادل جمالي

بادل جمالي: بادل جمالي، ٽيليويزن ڪارپوريشن'>پاڪستان ٽيليويزن ڪارپوريشن ڪراچي اسٽيشن جو سينيئر پروڊيوسر رهي چڪو آهي ۽ سنڌي ٻوليءَ جي تخليقي ۽ منفرد ڪھاڻيڪار طور سڃاتو وڃي ٿو. هن ڳوٺ شھزاد جمالي، ضلعي مٽياريءَ ۾، 29 مئي 1947ع تي جنم ورتو. پنھنجي ڳوٺ جو پھريون مئٽرڪ پاس، گرئجوئيٽ ۽ ماسٽرس ڊگري حاصل ڪيل شخص آهي. 1985ع ۾ پي. ٽي. ويءَ تي اسسٽنٽ پروڊيوسر مقرر ٿيو ۽ پنھنجيءَ محنت ۽ صلاحيت سان 1989ع ۾ پروڊيوسر ۽ بعد ۾ سينيئر پروڊيوسر ٿيو. پي ٽي ويءَ جا سمورا پروگرام، موسيقي، اسٽيج شو، ڊراما، ٻارن جا پروگرام، لانگ پلي، پورٽريٽ ۽ ادبي پروگرام ڪري چڪو آهي. پي ٽي وي ٽئين چئنل تي ”ادبيات“ جو سنڌي پروگرام به سندس هٿ ۾ هو. هن وقت رٽائر زندگي گذاري رهيو آهي. بادل جمالي 1975ع ۾ ڪھاڻيون لکڻ سان ادبي دُنيا ۾ پير پاتو. هن وقت تائين سندس ڪھاڻين جا مجموعا: ’پاڙي ناهه پروڙ‘ (1980ع)، ’سنگرام‘ (1987ع)، ’اويلو مسافر‘ (2013ع) ۽ ’نفيس خواب، ريشمي خواهشون‘ (ڪھاڻيون: 2021ع) ڇپجي چڪا آهن. ان کان علاوه ’چار ڪھاڻيڪار، چار نقاد‘، ’چونڊ سنڌي ڪھاڻيون‘ (1975ع کان 1980ع) ۽ منصور پبليڪيشن جا ٻه ’ڪھاڻي نمبر‘ (ڪتاب) مرتب ڪيل آهن. ادبي خدمتن جي مڃتا طور کيس سگا ۽ پاڪستان اڪادمي ادبيات اوارڊ ملي چڪا آهن.

داخلا ۾ استعمال ٿيل تاريخون

1947.05.29  عيسوي

پاڪستان ٽيليويزن ڪارپوريشن ڪراچي اسٽيشن جو سينيئر پروڊيوسر ۽ منفرد ڪهاڻيڪار بادل جمالي، ڳوٺ شهزاد جمالي ، ضلعي مٽياريءَ ۾ ، 29 مئي 1947ع تي جنم ورتو

اديب - ڀاڱي جون ٻِيون داخلائون