بهادر خان علياڻي: هي ڪلهوڙي حاڪم ميان عطر خان جو دوست ۽ بھاولپور رياست جي اولاهين حصي جو سردار هو. ڪلهوڙن جي دؤر ۾ ميان غلام شاهه ۽ سندس ڀائرن ميان عطر خان ۽ احمد يار خان ۾ اقتدار تان ڪافي لڙائيون ٿيون. ميان عطر شڪست کانپوءِ بھادر خان علياڻي وٽ مدد لاءِ وڃي پھتو. بھادر خان هڪ دفعو پھرين به ميان غلام شاهه سان عطر خان جي حق ۾ امرڪس واهه، روهڙي وٽ جنگ ڪري چڪو هو پر شڪست کاڌي هئي. وري عطر خان جي هلي اچڻ تي ٻيھر جنگ لاءِ تيار ٿيو هو. بھادر خان کي غلام شاهه جي حامي ۽ بھاولپور رياست جي حاڪم امير محمد مبارڪ خان ڪافي سمجهايو، پر هي ڪونه مڙيو ۽ هر حال ۾ عطر خان جي مدد جو فيصلو ڪيائين ۽ لشڪر تيار ڪري پنھنجي خاص حامي اختيار خان مدواڻي، ميان عطر خان ۽ ميان احمد يار سان گڏ لڙائيءَ لاءِ سنڌ ڏانھن روانو ٿيو. هوڏانھن ميان غلام شاهه به لشڪر وٺي، اوٻاوڙي پھتو ته بھادر خان علياڻي لشڪر سميت سندس رستو روڪيو. ٻنھي ڌرين ۾ لڙائي ٿي، ميان غلام شاهه جو چڱو خاصو لشڪر مارجي ويو. جنگ دوران بھادر خان علياڻي کي باهو نالي هڪ افغان جي نشاندهي تي غلام شاهه جي لشڪر گوليون هڻي قتل ڪري ڇڏيو ۽ سسي وڍي وڃي ميان غلام شاهه کي پھچائي. بھادر خان جي مارجڻ سان سندس لشڪر ڇڙوڇڙ ٿي ويو. سندس لاش ميان غلام شاهه پنھنجي ملازم ڪبير خان علياڻي (بھادر خان جي ڀاءُ) جي حوالي ڪيو. بھادر خان جو ٻيو ڀاءُ قائم خان علياڻي ميان عطر خان، ميان احمد يار خان ۽ اختيار خان کي وٺي جنگ جي ميدان مان ڀڄي ويو. هيءَ جنگ ’اوٻاوڙي جي لڙائي‘ جي نالي سان مشھور آهي.