تاريخ بهاولپور (ڪتاب ):هن ڪتاب جو مصنف مبازر الدوله پير ابراهيم قصوري آهي، جنهن 1794ع ۾ جنم ورتو هو. موصوف 1817ع ۾ رنجيت سنگهه وٽ ملازم ٿيو. ترت ئي تعليم حاصل ڪرڻ لاءِ دهليءَ ويو ۽ 1837ع ۾ ايسٽ انڊيا ڪمپنيءَ جي ملازمت ۾ داخل ٿي، ايجنٽ طور بهاولپور ۾ آيو. سکن واري پهرينءَ لڙائيءَ ۾ نمايان ڪردار ادا ڪيائين، جنهن جي صلي ۾’خلعت‘ ۽ ’خانبهادر‘ جا لقب حاصل ڪيائين. 1848ع ۾، بهاولپور کان فوج وٺي مسٽر هربرٽ ايڊورڊ جي امداد لاءِ ملتان ويو، جنهن “A Year on the Punjab Frontier” نالي ڪتاب ۾ سندس وڏي واکاڻ ڪئي آهي. 1851ع ۾ لنڊن ويو، جتان 1852ع ۾ بيمار ٿي واپس وريو. بهاولپور پهچڻ تي کيس ”مبارزالدوله“ جو خطاب مليو. 1859ع ۾ سندس انتقال ٿيو.
هن هي ڪتاب ”تاريخ بهاولپور“ ڪئپٽن ڪننگهام جي فرمائش تي، مرتب ڪيو، جنهن جو ترجمو، شهامت علي 1848ع ڌاري، انگريزيءَ ۾ ڪري لنڊن مان شايع ڪرايو. سنڌ جي تاريخ تي ان ۾ چڱو مواد موجود آهي.