تڪيو قلندر لعل شهباز: هيءَ مقبري نموني اڏاوت، درٻيلي ضلعي نوشهرو فيروز جي ڀرسان آهي جيڪا ”قلندر جو تڪيو“ ڪري سڏجي ٿي. عام روايت آهي ته قلندر جڏهن سيوهڻ پئي ويو ته ڪجهه عرصي لاءِ هتي ترسيو ۽ چلو پچايو هئائين. ڪيتري عرصي تائين هي مقبري نما اڏاوت مندر طور به استعمال ٿيندي رهي آهي. هيءَ عمارت هن وقت ڊاڪٽر ذوالفقار جروار جي رهائش طور استعمال ٿي رهي آهي. هن تڪيي تي هريجن ذاتين وارا ماڻهو گھڻي تعداد ۾ اچي عبادت ڪن ٿا.
هيءَ پڪ سري جاءِ آهي. جيڪا پنهنجي اصليت وڃائي چڪي آهي، جو وقت به وقت ان جي مرمت ٿيندي رهي آهي. صرف گنبذ جا نشان ڪنهن حد تائين اصلي حالت ۾ آهن. گنبذ جاءِ جي نسبت ڪجهه وڏو ۽ اٺ ڪنڊي ڳچ (Drum) جي مٿان گولائين طرز جو ٺهيل آهي. شايد اندر عمارت کي ڪنڊ جوڙون (Squishes) ڏئي چوڪور عمارت جي ڇت کي اٺ ڪنڊو ڪيو ويو هوندو. گنبذ جي بيهڪ عاليشان آهي. گنبذ جي مٿان ابتو ڪوڻيءَ جو گل به ٺهيل آهي، پر ان جا اوسا پاسا ٽٽي پيا آهن.
تڪيو ڇاڪاڻ ته رهائشي مقصد لاءِ استعمال ٿي رهيو آهي ان لاءِ اهو چئي نٿو سگھجي ته هن ۾ موجود ٻيون ثقافتي وٿون ڪهڙيون هيون، ڪنهن ٺهرايو، ڪڏهن ٺهرايو؟