ثناءُ الله عباسي ڊاڪٽر

ثناءُ الله عباسي، ڊاڪٽر: سنڌ جو نامور پوليس عملدار ثناءُ الله عباسيءَ، 20 آڪٽوبر 1964ع ۾ فضل الله عباسيءَ جي گهر، لاڙڪاڻي شهر ۾ جنم ورتو. هن پرائمريءَ کان انٽر تائين تعليم لاڙڪاڻي شهر ۾ حاصل ڪئي ۽ پوءِ ڪراچيءَ جي سنڌ ميڊيڪل ڪاليج مان ايم. بي. بي. ايس ڪيائين، گڏوگڏ چٽاڀيٽيءَ واري امتحان جي تياري به ڪندو رهيو. ان کانپوءِ هن ڪراچي يونيورسٽيءَ مان ڪرمنالاجيءَ ۾ ايم. اي جي ڊگري حاصل ڪئي، جنهن ۾ هن ’ڪراچي شهر ۾ گاڏين جي چوري‘ عنوان سان هڪ ٿيسز لکي، جنهن تمام وڏي مشهوري ماڻي.
ثناءُ الله عباسي، پرائمريءَ کان گرئجوئيشن تائين امتحانن ۾ پهرين پوزيشن کڻندو رهيو. هو مقابلي جو امتحان پاس ڪري اَي. ايس. پي طور پوليس کاتي ۾ داخل ٿيو، جنهن عهدي تي بهاولپور، حاصلپور، خيرپور ٽامي والي، اوڪاڙه شهر، ڏکڻ وزيرستان ۽ پشاور ۾ خدمتون سرانجام ڏئي چڪو آهي. ان کانپوءِ سنڌ صوبي ۾ اي. ايس. پي سکر، اي. ايس. پي ڪراچي ايسٽ، ويسٽ ۽ سينٽرل مقرر ٿيو. هو وزيراعليٰ سنڌ جو پي. ايس. او به رهي چڪو آهي. نوشهري فيروز، شڪارپور، جيڪب آباد جي اي. ايس. پي رهڻ کانپوءِ بلديه ڪراچيءَ ۾ پوليس ٽريننگ سينٽر جو پرنسپال، ايس. ايس. پي ملير، ايس. پي اسپيشل برانچ، 2007ع ۾ اينٽي ڪار لفٽنگ سيل جو ايس. ايس. پي، ۽ ڊپٽي ڊائريڪٽر ايف. آءِ. اي ڪراچي، حيدرآباد، ٽي. پي. او گلشن اقبال ۽ ٽي. پي. او صدر ڪراچيءَ طور خدمتون پڻ سرانجام ڏئي چڪو آهي. هي ڪجهه وقت اسسٽنٽ ڊي. آءِ. جي ڪرائمس اينڊ آپريشنز حيدرآباد، 2012ع ۾ اسسٽنٽ ڊي. آءِ. جي (ائڊمن) ٽريفڪ حيدرآباد، لاڙڪاڻي ريجن جو ڊي. آءِ. جي ٿي رهيو ۽ هن وقت ڊي. آءِ. جي پوليس حيدرآباد جي عهدي تي فائز آهي. هن جي پي. ايڇ. ڊي جو تحقيقي ڪم پڻ جاري آهي.
ثناءُ الله عباسي سنڌ جو بي ڊپو ۽ قابل پوليس آفيسر آهي. ڪيترن ئي پيچيده ڪيسن جي جاچ سندس حوالي رهي آهي. سندس ايمانداريءَ ۽ انصاف سبب هو اڪثر دٻاون ۽ بدلين جو شڪار رهيو آهي، پر ساڳئي وقت غريب ماڻهن جي محبتن سندس حوصلو بلند رکيو آهي.
ڪرمنالاجيءَ تي لکيل سندس ٿيسز جو ترجمو رشيد مڱريي ڪيو ۽ ان کي وير پبليڪيشن جي سربراهه ستار وسطڙي، جولاءِ 2006ع ۾ ڇپائي پڌرو ڪيو. هي ڪتاب ثناءُ الله عباسيءَ ’پنهنجي عزيز والدين ۽ ٻارن کي‘ منسوب ڪيو آهي. ڪتاب ۾ عباسي صاحب گاڏين چوري ڪندڙ گروهن جي سماجي حيثيت ۽ ان عمل لاءِ راغب ٿيڻ ۾ سماجي ۽ نفسياتي رُخن کي غور هيٺ آڻي، گاڏين چوري ٿيڻ جي ٻاهرينءَ دنيا جي ملڪن سان گڏ پاڪستان ۾ ٿيندڙ واقعن جو مڪمل تفصيل ڏنو آهي ۽ ڏوهن کي روڪڻ ۽ ڏوهارين کي سزا ڏيندڙ ادارن جا تفصيل ۽ ڪارگذاري به بيان ڪئي آهي.
ثناءُ الله عباسيءَ کي سندس ايمانداري، فرض شناسي ۽ بهادريءَ سبب جتي سنڌي سماج ۾ عزت ۽ نيڪنامي ملي آهي، اتي هن کي جوڳي مڃتا پڻ ملي آهي. 2012ع ۾ صدر پاڪستان طرفان کيس قائداعظم پوليس ميڊل ڏئي سندس خدمتن جي مڃتا ڪئي وئي آهي.

داخلا ۾ استعمال ٿيل تاريخون

1964.10.20  عيسوي

سنڌ جو نامور پوليس عملدار ثناءُ الله عباسيءَ، 20 آڪٽوبر 1964ع ۾ فضل الله عباسيءَ جي گهر، لاڙڪاڻي شهر ۾ جنم ورتو.

شخصيتون - ڀاڱي جون ٻِيون داخلائون