جان ﷲ شاھہ عاشق:مير جان ﷲ شاھہ ’عاشق‘، سيد منور علي شاھہ جو پٽ هو. روهڙي شھر جي صوفين جي سرواڻ مير جان ﷲ شاھہ اول جي اولاد مان هو. مير جان ﷲ شاھہ ’عاشق‘ پيءُ جي وفات کان پوءِ درگاھہ جو سجادہ نشين ٿيو. هن سيد عبدالوهاب شاھہ جيلاني ڀاڳناڙيءَ واري کان روحاني فيض حاصل ڪيو ۽ علم جي تمام وڏي درجي تي رسيل هو. جان ﷲ شاھہ ثاني ’عاشق‘ فارسيءَ جو صاحب ديوان شاعر ٿي گذريو آهي. هن سنڌيءَ ۾ بہ صوفياڻي شاعري ڪئي آهي. سندس ڪلام ۾ عشق ۽ تصوف جي تنوار ۽ وحدت جي وائي موجود آهي. سندس شاعري پختگيءَ جي لحاظ سان بہ مٿانهين درجي جي آهي. وڏو فياض شخص هو، جيڪو بہ وٽس ايندو هو، روحاني ۽ دنيوي فيض پرائي ويندو هو. ڀاڳناڙيءَ واري بزرگ سان نسبت سبب سندس مائٽ مٿس ناراض ٿيندا رهندا هئا، جنهنڪري پنھنجي ساٿين سان گڏ روهڙي شريف جي واعظ واري مسجد ۾ رهندو هو. سيد جان ﷲ شاھہ ’عاشق‘ 1255ھہ/ 1839ع ڌاري وفات ڪئي. سندس مزار روضي کان ٻاهر شاهي دروازي تي آهي.