جنهاڻ 2: ضلعي ٿرپارڪر جي تعلقي مٺيءَ جو هي اهم ڳوٺ قديم هاڪڙي جي ڪنڌيءَ تي، مهراڻي واري علائقي ۾ آباد آهي، جنهن جي آدمشماري چئن کان پنج هزار ٿيندي. چيو وڃي ٿو ته جنهاڻ به هن علائقي جي ٻين ڀِڙن- فضل الله جي ڀڙي، سائينداد ڀڙي ۽ مشهور تاريخي ماڳ نُهٽي وانگر هڪ ڀڙو هو. جنهاڻ ڳوٺ اڳوڻي ٿرپارڪر مان ورهائجي ڌار ٿيل ٽن ضلعن- ٿرپارڪر، عمر ڪوٽ ۽ ميرپورخاص جي ميلاپ واري هنڌ تي موجود آهي. جنهن ۾ هن وقت گھڻي ڀاڱي جوڻيجا ذات جا ماڻهو رهن ٿا، جڏهن ته اڳي ميگھواڙ ۽ ٻيون ذاتيون به هتي رهنديون هيون، پر هاڻي محاورتاً هي ڳوٺ ”جوڻيجن واري جنهاڻ“ به سڏجي ٿو. سنڌ جي نامور اديب، ڪهاڻيڪار ۽ ڊراما نگار عبدالقادر جوڻيجي جو هي اباڻو ڳوٺ آهي .