سومرو جنيد احمد

جنيد احمد سومرو : قومپرست سياستدان جنيد احمد سومري ولد حيدر بخش سومري جو جنم 3 آگسٽ 1954ع تي شڪارپور ۾ ٿيو. جنيد سومرو، شھيد ﷲ بخش سومري جو پوٽو هو. هن پرائمريءَ کان انٽر تائين شڪارپور ۾ تعليم ورتي. بعد ۾ دائود انجنيئرنگ ڪاليج ڪراچيءَ مان اليڪٽرانڪ انجنيئرنگ ۾ B.E ڪيائين. جنيد سومرو شاگرديءَ واري زماني کان وٺي قومپرست سياست سان وابستہ رهيو. جنيد سومرو شڪارپور مان صوبائي اسيمبلي توڙي لوڪل باڊيز جي چونڊن ۾ وقت بوقت قسمت آزمائيندو رهيو، 1985ع جي غير جماعتي چونڊن ۾ پهريون ڀيرو ايم. پي. اي چونڊيو. 1988ع جي چونڊن ۾ آزاد اميدوار طور بيٺو ۽ بعد ۾ بائيڪاٽ ڪيائين، ان بعد هن سنڌ نيشنل فرنٽ ۾ شموليت اختيار ڪئي ۽ 1990ع جي چونڊن ۾ فرنٽ جي پليٽفارم تان صوبائي اسيمبليءَ جي چونڊن ۾ بيٺو، پر ڪامياب ٿي نہ سگهيو. ٻيهر 1993ع وارين چونڊن ۾ بہ هن قسمت آزمائي، پر کيس ڪاميابي نصيب نہ ٿي. 1997ع جي چونڊن ۾ قومي اسيمبليءَ جي تڪ تي پ پ (ش. ڀ) جي ٽڪيٽ تي چونڊ وڙهيو، جنهن ۾ پڻ ڪامياب نہ ٿي سگهيو ۽ سندس مد مقابل پ پ پ جي اميدوار آفتاب شعبان ميراڻيءَ ڪاميابي حاصل ڪئي. پ پ (ش ڀ) سان اختلاف ٿيڻ بعد هن پيپلز پارٽيءَ ۾ شموليت اختيار ڪئي. جنيد سومرو 2000ع ۾ لوڪل باڊيز جي چونڊن ۾ ضلعي ناظم لاءِ پڻ بيٺو، 2002ع جي چونڊن ۾ پيپلز پارٽيءَ پاران ايم. پي. اي لاءِ بيٺو، پر ڪامياب نہ ٿي سگهيو. اهڙيءَ طرح 2008ع جي چونڊن ۾ پڻ هن قسمت آزمائي ڪئي. جنيد سومرو ڪجهہ عرصي پ پ (ش ڀ) سنڌ جو صدر پڻ رهيو. هي خانداني روايت موجب غريبن، مسڪينن ۽ هيڻن جو همدرد سياستدان هو. ذات پات جي فرق کان سواءِ هر ڪنهن جو ڪم ڪندو هو. جنيد سومري 09 آگسٽ 2009ع تي ڪراچيءَ ۾ 55 سالن جي ڄمار ۾ لاڏاڻو ڪيو، کيس هاٿيدر تي پنج پير واري آبائي قبرستان ۾ شھيد الھہ بخش سومري جي پاسي ۾ مٽيءَ ماءُ حوالي ڪيو ويو.

داخلا ۾ استعمال ٿيل تاريخون

1954.08.03  عيسوي

قومپرست سياستدان جنيد احمد سومري ولد حيدر بخش سومري جو جنم 3 آگسٽ 1954ع تي شڪارپور ۾ ٿيو.

2009.08.09  عيسوي

قومپرست سياستدان جنيد سومري 09 آگسٽ 2009ع تي ڪراچيءَ ۾ 55 سالن جي ڄمار ۾ لاڏاڻو ڪيو.

شخصيتون - ڀاڱي جون ٻِيون داخلائون