جيوترام ويڙهومل مٽائي: ٺارو شاھہ جي مٽائي هندن جي پاڙي مان جيوترام ويڙهو مل صوفي ۽ درويش صفت انسان 1885ع ڌاري ڄائو هو. شروعات ۾ حيدرآباد جي نو ودياليه اسڪول ۾ ماستر ٿيو. جتي سيد قطب علي شاھہ جھانيان واري سان قرب ٿيس، جنهن سندس روح کي رڱي وڌو. هيءُ طالب علميءَ واري وقت کان وٺي سائين قطب شاھہ جي خدمت ۾ رهندو هو ۽ اتي فيض حاصل ڪندو رهيو. 1914ع ۾ ’هڪ لڪل لعل‘ نالي سنڌيءَ ۾ ڪتاب شايع ڪرايائين، جنهن ۾ جھانيان خاندان جي هڪ بزرگ سيد مير غلام عباس شاھہ ولد سيد روشن علي شاھہ جي سوانح حيات ۽ سندس اقوال زرين لکي پنھنجي عقيدت جو اظهار ڪيائين. جيوترام 21 آگسٽ 1914ع تي 74 ورهين جي ڄمار ۾ ٽنڊي جھانيان ۾ لاڏاڻو ڪيو. صوفي قطب علي شاھہ جيوترام لاءِ هيٺيون بيت چيو:
ســدا هـجـيــن جـيـئرو، جـيـئن جيتارام،
وڏي هجيئي حياتي، سدا هجين سان نام،
پيهـي ڏس پـاڻ، تـه انـدر ۾ اثبات ٿيئي.
اڳتي هلي سندس فرزند ويسو مل جيوترام (وي. جي مٽائيءَ) ’جھانيان خاندان‘ تي ڪتاب لکيو، جنهن جا انسٽيٽيوٽ آف سنڌالاجيءَ ٻہ ڇاپا ڇپايا آهن.