حاجي علي شاهه هنڱورو: ناليوارو استاد ۽ عالم سيد حاجي علي شاهه، 29 مئي 1912ع تي هنڱوري، تعلقي پني عاقل، ضلعي سکر ۾ فضل شاهه جـي گهـر ۾ جـنـم ورتـو. سـنـدس والـد ننڍي هوندي ئي وفات ڪري ويو، ابتدائي تعليم هنڱوري جي اسڪول مان استاد گُرڏني مل ۽ ڪاڇي مل کان حاصل ڪيائين، انگريزي تعليم ميونسپل هاءِ اسڪول سکر مان حاصل ڪيائين، جتي روهڙيءَ جي قاضي خاندان جي مشهور فرد استاد علي رضا قاضيءَ جي کيس رهنمائي حاصل رهي. حاجي علي شاهه 1931ع ۾ واڌو مل اڪيڊميءَ مان مئٽرڪ پاس ڪئي، بعد ۾ شڪارپور جي علوي خاندان جي چشم و چراغ ميان مير احمد علوي شڪارپوريءَ جي مهربانيءَ سان چڪ ڀرسان ڳوٺ قاسم ۾ انگريزي ماستر مقرر ٿيو، جتان بدلي ٿي پير جي ڳوٺ آيو.
پير جي ڳوٺ ۾ نوڪريءَ دوران پاڳارن پيرن سان سندس تعلق جڙيو ۽ پير سائينءَ جي ننڍي فرزند نادر علي شاهه کي انگريزي مضمون ۾ ٽيوشن ڏنائين. هو پير جي ڳوٺ، اوٻاوڙي، ميرپور ماٿيلي، پني عاقل ۽ ڳڙهي ياسين جي هاءِ اسڪولن ۾ استاد ٿي رهيو ۽ ڪيئي ڪامياب شاگرد پيدا ڪيائين. 1969ع ۾ ڏهرڪي هاءِ اسڪول مان هيڊماستر طور رٽائر ڪيائين. شاهه صاحب زاهد قسم جو ماڻهو هو، رٽائرڊ ٿيڻ کان پوءِ هنڱوري ۾ جامع مسجد جوڙايائين ۽ ان جو پيش امام ٿي رهيو. شاهه صاحب سنڌي ۽ انگريزيءَ جي گرامر جا ڪتاب لکيا، جيڪي استادن ۽ شاگردن ۾ ڏاڍا مقبول ٿيا.
حاجي علي شاهه جون 2002ع ۾ وفات ڪئي. سندس نالي پٺيان هنڱوري ۾ ’علي شاهه پبلڪ اسڪول‘ قائم آهي.
1912.05.29 عيسوي
ناليوارو استاد ۽ عالم سيد حاجي علي شاهه، 29 مئي 1912ع تي هنڱوري، تعلقي پني عاقل، ضلعي سکر ۾ فضل شاهه جـي گهـر ۾ جـنـم ورتـو.