حاجي غلام حسين ميمڻ: سنڌ جي نامياري سياسي ۽ سماجي ڪارڪن حاجي غلام حسين ولد حاجي سکيي ميمڻ، 12 فيبروري 1949ع ڌاري ضلعي ٺٽي جي شھر گُجي ۾ جنم ورتو. هن ابتدائي تعليم پنھنجي شھر گجي مان پرائڻ کانپوءِ حديث، فقھ ۽ ديني تعليم ٺٽي شھر جي مختلف مدرسن مان حاصل ڪئي. کيس پنھنجي والد وانگر سماجي ۽ عوامي خدمتن جو شوق هو، جنهنڪري بلدياتي سياست ۾ دلچسپي ورتائين ۽ 1989ع ۾، 29 سالن جي عمر ۾ يونين ڪائونسل گجي جو چيئرمئن چونڊيو ويو. ٿوري ئي عرصي ۾ ٺٽي ضلعي جي اهم سماجي ۽ سياسي شخصيت بڻجي ويو. هن اعتدال پسند پاليسين، ڪردار ۽ گفتار جي پارسائي ۽ نرم مزاجيءَ ڪري آفيسرن توڙي عوام ۾ بيحد مقبوليت ماڻي ورتي ۽ 1984ع وارين بلدياتي چونڊن ۾ ٻيو ڀيرو بنا مقابلي چيئرمئن چونڊجي ويو. ان کان سواءِ مختلف وقتن تي جسٽس آف پيس، سب ڊويزنل ڪرائيم ڪميٽيءَ جو ميمبر، سب ڊويزنل سوشل ويلفيئر ڪميٽيءَ جو ميمبر ۽ اسپيشل مئجسٽريٽ آف پرائز بہ رهيو. 1986ع جي بلدياتي چونڊن ۾ ضلعي ڪائونسل ٺٽي جو ميمبر چونڊيو ويو ۽ چيئرمئن جي حيثيت سان پنھنجي ڳوٺ ۾ بجلي، هاءِ اسڪول، بيسڪ هيلٿ يونٽ، واٽر سپلاءِ گرلس اسڪول قائم ڪرائڻ سان گڏ ۽ ٻيا ڪم بہ ڪيائين. هن 19 مارچ 2000ع تي وفات ڪئي.
1949.02.12 عيسوي
سنڌ جي نامياري سياسي ۽ سماجي ڪارڪن حاجي غلام حسين ولد حاجي سکيي ميمڻ، 12 فيبروري 1949ع ڌاري ضلعي ٺٽي جي شهر گُجي ۾ جنم ورتو.
2000.03.19 عيسوي
هن 19 مارچ 2000ع تي وفات ڪئي.