حزب الله ميمڻ، شهيد

حزب ﷲ ميمڻ، شھيد: سنڌ يونيورسٽيءَ جي سائيڪالاجي ڊپارٽمينٽ جي ائسوسيئيٽ پروفيسر، حزب ﷲ ميمڻ جا وڏا اصل مٽياريءَ جا رهاڪو هئا. سندس والد جو نالو حاجي عبدالڪريم ميمڻ هو، جنهن جو حيدرآباد شاهي بازار ۾ آڏاڻي جي اُڻيل ڪپڙي ۽ ڇُر جي ڪپڙن، جھڙوڪ: اجرڪ، سوسي، گربي، لونگي، کيسَ ۽ ٽوپين وغيرہ جو ’حاجي عبدالڪريم اينڊ سنز‘ جي نالي سان جڳ مشھور دڪان، 1935ع کان وٺي قائم هو.
حزب ﷲ ميمڻ، 25 سيپٽمبر 1944ع تي فقير جي پِڙ، حيدرآباد ۾ جنم ورتو. هن پرائمري تعليم گورنمينٽ پرئڪٽسنگ ٽريننگ ٽيچرس ڪاليج حيدرآباد جي پرائمري سيڪشن ۾ ورتي ۽ مئٽرڪ نورمحمد هاءِ اسڪول مان ڪيائين.
حزب ﷲ ميمڻ، سنڌ يونيورسٽي ڄام شوري مان پهرين پوليٽيڪل سائنس ۾، ۽ بعد ۾ سائڪالاجيءَ ۾ ايم. اي ڪئي. ان کان سواءِ هن سنڌ لا ڪاليج مان ايل. ايل. بي جي ڊگري پڻ حاصل ڪئي. 1974ع ۾ سنڌ يونيورسٽيءَ جي سائڪلاجي ڊپارٽمينٽ ۾ ليڪچرر مقرر ٿيو. انهيءَ دوران هن سائڪالاجيءَ سان گڏوگڏ سنڌي هنرن ۽ ثقافت تي ڪيترائي تحقيقي ۽ تاريخي مقالا لکيا. هن ڏيھہ ۽ پرڏيھہ ۾ ڪيترين ئي ڪانفرنسن ۾ شرڪت ڪري، تحقيقي مقالا پيش ڪيا.
حزب ﷲ ميمڻ، ترقي ڪري ائسوسيئيٽ پروفيسر جي عهدي تي پهتو ۽ پنھنجي وقت جو بھترين ۽ باصلاحيت استاد رهيو. سندس شاگردن ۽ استادن ۾ وڏو احترام ۽ عزت هئي. هن پنھنجي زندگيءَ ۾ سنڌ جي مشھور عالمن ۽ اديبن: پير حسام الدين شاھہ راشدي، ڊاڪٽر نبي بخش خان بلوچ، ڊاڪٽر عبدالواحد هاليپوٽي، محمد ابراهيم جويي، ڊاڪٽر جي. ايم. مهڪري، پروفيسر ظفر حسن، خيرالنساءِ جعفري ۽ سماج جي ٻين شعبن سان واسطيدار شخصيتن سان واسطو رکيو ۽ ساڻن سنڌي سماج ۽ ثقافت جي ترقيءَ لاءِ ڪم ڪيو. پروفيسر صاحب وٽ 10 هزارن کان مٿي ڪتابن جي ذاتي لائبرري هئي، جنهن ۾ قرآن پاڪ جا ڪيترائي قلمي نسخا ۽ ٻيا ناياب ڪتاب موجود هئا. پروفيسر حزب ﷲ ميمڻ کي سِڪن سان وڏي دلچسپي هئي ۽ وٽس سون، چاندي، پتل ۽ ٽامي جا هزارين سِڪا موجود هئا، جن ۾ خاص ڪري سڪندراعظم کان وٺي سمن ۽ اڪبر جي دؤر جا ناياب سڪا ۽ سنڌ جي ٽالپر حڪمرانن جا تاج، ڪپڙا ۽ سِڪا بہ شامل هئا. وٽس سِڪن، ڪتابن ۽ سنڌ جي ناياب هنري شين ڏسڻ لاءِ سنڌ جو اڳوڻو وڏو وزير ممتاز علي خان ڀٽو، ڄام صادق علي، پيار علي الانا، عبدالله خان ورياھہ، ڊاڪٽر غلام علي الانا ۽ ٻيا وقت بوقت ايندا رهندا هئا. پروفيسر صاحب جو اهو ناياب ذخيرو هميشہ ڪن متعصب ۽ سنڌ دشمن ماڻهن جي اک ۾ ڪَنڊي وانگر چُڀندو رهيو، ان ڪري هنن 1972ع ۾ 1977ع دوران ان ذخيري کي نقصان پهچائڻ جي ڪوشش ڪئي. خاص ڪري، 27 مئي 1990ع جي لساني فسادن دوران اُهي متعصب ماڻهو پروفيسر صاحب جو سمورو تاريخي ۽ تهذيبي ذخيرو لُٽي کڻي ويا ۽ 10 ڏينهن بعد، کيس 7 جون 1990ع تي سندس زير تعمير گهر، ڊفينس سوسائٽي، حيدرآباد ۾ ڳولي اچي شھيد ڪيو.
شھيد پروفيسر حزب ﷲ ميمڻ کي اباڻي قبرستان ’ميئون جيئندو، مٽياريءَ‘ ۾ دفن ڪيو ويو.

داخلا ۾ استعمال ٿيل تاريخون

1944.09.25  عيسوي

حزب الله ميمڻ، 25 سيپٽمبر 1944ع تي فقير جي پِڙ، حيدرآباد ۾ جنم ورتو.

1990.06.07  عيسوي

هن کي 7 جون 1990ع تي شهيد ڪيوويو.

شخصيتون - ڀاڱي جون ٻِيون داخلائون