ڊاڪٽرخادم منگي

خادم منگي، ڊاڪٽر: ڊاڪٽر خادم علي ولد حاجي خالق ڏنو منگي، 15 اپريل 1969ع تي ڳوٺ دودي ڏيٿي، تعلقي ڳڙهي ياسين، ضلعي شڪارپور ۾ پيدا ٿيو. هُن ايم بي بي ايس جو امتحان 1992ع ۾ چانڊڪا ڪاليج لاڙڪاڻي مان پاس ڪيو. 1996ع ۾ گورنمينٽ اسپتال مدئجيءَ ۾ ڪئيوئلٽي ميڊيڪل آفيسر (سي ايم او) مقرر ٿيو. 2007ع ۾ غلام محمد مھر ميڊيڪل ڪاليج سکر ۾ ڊمانسٽريٽر/ليڪچرر جي عھدي تي مقرر ٿيو. هُن شاعريءَ جي شروعات 1987ع کان ڪئي. سندس شاعري ’هزار داستان‘، ’سوجهرو‘، ’نئين زندگي‘، سنڌو‘، ’پرک‘، ۽ ’سُڳنڌ‘ ۽ ٻين رسالن ۾ شايع ٿيندي رهي آهي. هن شاھہ عبداللطيف ڀٽائي جي ٽيھن سُرن تي جديد انداز ۾ ڪم ڪيو آهي. ڊاڪٽر خادم انجمن ترقي پسند مصنفين سنڌ جو جنرل سيڪريٽري، پاڪستان ميڊيڪل ايسوسيئيشن سکر جو پريس سيڪريٽري ۽ سکر آرٽس ڪائونسل جو ميمبر آهي. ان کانسواءِ ڊمانسٽريٽر ڪائونسل جو جنرل سيڪريٽري، جي ايم سي ٽيچر ايسوسيئيشن جو پريس سيڪريٽري، جاڳرتا فورم سکر جو چيئرمين ۽ سيڪريٽري، سنڌي ادبي سنگت شاخ چانڊڪا ميڊيڪل ڪاليج ۽ سکر شاخ جو سيڪريٽري، ’انجمن‘ رسالي جي ادارت ۾ ڊاڪٽر بدر اڄڻ جو ٻانھن ٻيلي ۽ معاون، سکر مان سنڌي ادبي سنگت شاخ سکر جي ترجمان نيوز ليٽر سنگت سماچار جو ايڊيٽر پڻ رھي چڪو آهي. سندس ٻہ ڪتاب ’پرھہ باکون ڪڍيون‘ (شاعري، 2005ع) ۽ ’کنھنبا ڪنديس ڪپڙا‘ (شاعري، 2010ع) ڇپيل آهن. سندس ڪتاب ’پرھہ باکون ڪڍيون‘ کي سنڌي ادبي سنگت سنڌ پاران 2005ع ۾ سال جو پھريون نمبر ايوارڊ مليو. ان کانسواءِ کيس ’بيدل ايوارڊ‘، ’نشانِ فيض‘ سميت ٻيا ايوارڊ پڻ مليل آھن.

داخلا ۾ استعمال ٿيل تاريخون

1969۔04۔15  عيسوي

ڊاڪٽر خادم علي ولد حاجي خالق ڏنو منگي، 15 اپريل 1969ع تي ڳوٺ دودي ڏيٿي، تعلقي ڳڙهي ياسين، ضلعي شڪارپور ۾ پيدا ٿيو.

شخصيتون - ڀاڱي جون ٻِيون داخلائون