خواجه، خطير: خواجه خطير تغلق دؤر ۾ بکر جو گورنر هو. علاؤ الدين بادشاهه 1300ع ڌاري وفات ڪئي، ان کان پوءِ خلجي خاندان جو پويون حاڪم، خسرو خان دهليءَ جي تخت تي ويٺو، ان جي دؤر ۾ هندو- مسلم فساد ٿيا، جنهنڪري حاڪم جا امير ۽ وزير به مخالف ٿي پيا ۽ سندس فوجي عملدار ملڪ غازي خان پنهنجي پٽ سان گڏجي ملتان ۽ سنڌ مان لشڪر وٺي دهليءَ تي حملو ڪيو. سخت جنگ کان پوءِ خسرو خان شڪست کائي ڀڄي ويو، جنهن بعد ملڪ غازي خان 720هه/ 1320ع ڌاري دهليءَ جي تخت تي ويٺو ۽ غياث الدين تغلق جي لقب سان مشهور ٿيو. ان حاڪم ٿيڻ شرط جيڪي گورنر مقرر ڪيا، تن ۾ بکر جو گورنر خواجه خطير مقرر ڪيو ويو. (حوالو: تاريخ سنڌ (پنج ڀاڱا) مولوي نور محمد نظاماڻي)