خواجه گل محمد: خواجه گل محمد، لقب محبوب الصمد، سلطان الاولياء خواجه محمد زمان اول جو فرزند هو. سندس جنم 11 ربيع الاول 1177هه/1763ع ۾ ٿيو. والد جو ساڻس بيحد پيار هو ۽ کيس لاڏ ڪوڏ سان پاليائين. هن فرزند جي مقام ۽ مرتبي جي اهڃاڻن مان ئي پرکي ورتو هو. قرآن شريف ۽ فارسي پڙهڻ کان پوءِ کيس مولانا شرف الدين شهدادپوريءَ وٽ صرف و نحو ۽ علم عروض پڙهڻ لاءِ وهاريو ويو. ننڍپڻ ۾ سندس گھڻو لاڙو سلوڪ ڏانهن هو. اڃا يارهن ورهين جي ڄمار جو هو ته سندس والد وفات ڪري ويو. سندس مسند نشيني واري سوال تي ڪن خليفن اعتراض اٿاريو ته خواجه گل محمد اڃا ٻار آهي، سو مريدن جي ڪهڙي تربيت ڪري سگھندو. انهيءَ تي مخدوم عبدالرحيم گرهوڙي، شيخ ابوطالب ۽ ٻين بزرگن چيو ته هي باطني معاملو آهي. اسان کي نينگر جي ڄمار ڏسڻ نه گھرجي. پوءِ خواجه محمد زمان جي وفات کان ٽئين ڏينهن خواجه گل محمد کي مسند تي ويهاريو ويو. اول شيخ عبدالرحيم سندس بيعت ڪئي، پوءِ ٻين وڏن خليفن شيخ ابوطالب، حاجي طاهر، حافظ هدايت الله ۽ ٻين بيعت ڪئي. هن بزرگ جي وفات ربيع الثاني 1218هه/آگسٽ 1803ع ۾ ٿي.