درازي، سخي قبول محمد فاروقي (ٻيو): نامياري صوفي درويش ميان سخي قبول محمد فاروقي (ٻيو) ولد ميان نجم الدين 1261هه مطابق 1842ع ۾ جنم ورتو. ڏهن سالن جي ننڍڙيءَ عمر ۾ ئي درازي درگاهه جو گادي نشين ٿيو. هي درويش هڪ سخي دل هوندو هو، جيڪو به نذرانو وغيره کيس ملندو هو، سو اُتي جو اُتي ئي غريبن ۽ مسڪينن کي ڏئي ڇڏيندو هو. ايتري قدر جو پنهنجن ڪڙمين کان زمين جي بٽئي به نه وٺندو هو. ان هوندي به سندس لنگر اٺئي پهر جاري رهندو هو. سخي قبول محمد جي مريدن ۾ مسلمان توڙي هندو شامل هئا. سندس زندگيءَ ۾ درگاهه تي راڳ ۽ ويراڳ جون محفلون اڳ کان به وڌيڪ ٿيڻ لڳيون. ڪيترا انگريز به هن درگاهه جي هاڪ ٻڌي سخي قبول محمد جا اچي مريد ٿيا. سخي قبول محمد (ثاني) کي چار فرزند: ميان محمد بچل، ميان نظر محمد (ثاني)، ميان صاحبڏنو (ثاني) ۽ ميان رسم علي هئا. هن درويش 23 ذوالقعد 1343هه مطابق 1924ع ۾ وفات ڪئي.