درگاهه صوفي وريل فقير ابڙو

درگاهه صوفي وريل فقير ابڙو: هيءَ درگاهه ضلعي قمبر شهدادڪوٽ ۾ قمبر شهر جي اوڀر ۾ 11 ڪلوميٽرن تي ڳوٺ ڏتل ابڙي ۾ ميان شاهل محمد ڪلهوڙي جي مقبري جي ڀر ۾ آهي. درگاهه جي روضي جي اوچائي 20 فوٽ ۽ ويڪر 27 فوٽ ٿيندي. مقبري اندر صوفي وريل فقير (اول) ۽ صوفي وريل فقير ثانيءَ جون تربتون آهن. روضي جي احاطي واري ميدان ۾ صوفي علي نواز فقير ۽ ٻيا سندس عزيز قريب دفن ٿيل آهن. درگاهه جي اوڀر ۾ باغيچو ۽ ڏکڻ ۾ رهائشي ڪمرا ٺهيل آهن، جتي زيارتين جي رهائش جو جوڳو انتظام ٿيل آهي. درگاهه جي سامهون وڏو ميدان آهي، جتي راڳ رنگ توڙي صوفي سماع جون محفلون ٿينديون رهنديون آهن. مقبري جي دروازي تي جنڊيءَ جو دلڪش ڪم ٿيل آهي. اهو دروازو صوفي وريل فقير جي معتقد لاڙڪاڻي جي رهواسي محمد حسن سومري ٺاهيو هو. هيءَ درگاهه 2000ع ۾ جوڙائي وئي، جڏهن ته درگاهه جي مٿان وارا ٻئي قبا 2009ع ۾ جوڙايا ويا. صوفي وريل فقير ولد حمل خان ابڙي جو اصل نالو الهورايو هو، پيار مان کيس ننڍپڻ ۾ وريل چوندا هئا، هي فقير تصوف جي رنگ ۾ رنگجي ويو، جهل مگسي، بلوچستان جو هڪ صوفي بزرگ الهڏنو فقير سندس مرشد هو. صوفي وريل فقير سنڌي، اردو، سرائيڪي ۽ پنجابيءَ ۾ شاعري به ڪئي. سندس شاعريءَ تصوف جي حوالي سان برجستي ڪلام جي حيثيت رکي ٿي. سندس ڪلام تي مشتمل هڪ ڪتاب ’عشق سلامت رهي‘ پڻ ڇپجي چڪو آهي. هر سال 8- 9 نومبر تي هن درگاهه تي صوفي وريل فقير جو ساليانو عرس صوفياڻين ريتن مطابق ملهايو ويندو آهي. هن وقت هن درگاهه جو ٽيون گادي نشين صوفي حاڪم فقير ابڙو آهي، جڏهن ته سندس ڀاءُ صوفي گدا حسين ابڙو هن درگاهه جو خاص خدمتگار آهي.

درگاهه - ڀاڱي جون ٻِيون داخلائون