راشدي سيد ڪليم الله شاهه

راشدي، سيد ڪليم الله شاهه: نامور شاعر سيد ڪليم الله شاهه راشديءَ 1876ع ڌاري پير جي ڳوٺ، نئين ديري، ضلعي لاڙڪاڻي ۾ جنم ورتو. ابتدائي تعليم سبي بلوچستان مان حاصل ڪيائين. کيس سنڌي، اردو، سرائيڪي ۽ فارسي ٻولين تي عبور حاصل هو ۽ چئني ٻولين ۾ نهايت سليقي سان شعرگوئي ڪيائين. پر اردو ٻوليءَ ۾ سندس شاعريءَ جو تعداد وڌيڪ آهي. سنڌ جي نامياري محقق ڊاڪٽر نبي بخش خان بلوچ پنهنجي ڪتاب ’سنڌ مين اردو شاعري‘ (راز عهد شاهجهان تا قيامِ پاڪستان) ۾ سيد ڪليم الله شاهه راشديءَ جو ذڪر ڪندي ڄاڻايو آهي ته 1904ع ۾ سندس اردو غزلن جو مجموعو ڇپيل آهي، جنهن مان اهو اندازو لڳائي سگھجي ٿو ته سندس ٻيا به شعري مجموعا ڇپيا هوندا، جيڪي هن وقت اڻ لڀ آهن. سيد ڪليم الله شاهه جي شاعريءَ ۾ فن ۽ فڪر جو حسين سنگم نظر اچي ٿو. سندس شاعريءَ ۾ بي انتها گھرائي سمايل آهي، کيس راڳ ۽ ويراڳ سان بي انتها چاهه هو. ان دؤر ۾ ننڍي کنڊ جا ڪيترائي گويا وٽس اچي راڳ رنگ جون محفلون ڄمائيندا هئا. سيد ڪليم الله شاهه جو هڪ قلمي نسخو ميرزا عباس علي بيگ وٽ حيدرآباد ۾ محفوظ پيل آهي. کيس سير و سياحت جو پڻ بيحد شوق هوندو هو. هيءُ هڪ ڀيري بمبئيءَ ويو، جتي سندس وفات ٿي.

شاعر - ڀاڱي جون ٻِيون داخلائون