راشدي سيد ڪليم الله شاهه

راشدي، سيد ڪليم ﷲ شاھہ: نامور شاعر سيد ڪليم ﷲ شاھہ راشديءَ 1876ع ڌاري پير جي ڳوٺ، نئين ديري، ضلعي لاڙڪاڻي ۾ جنم ورتو. ابتدائي تعليم سبي بلوچستان مان حاصل ڪيائين. کيس سنڌي، اردو، سرائيڪي ۽ فارسي ٻولين تي عبور حاصل هو ۽ چئني ٻولين ۾ نهايت سليقي سان شعرگوئي ڪيائين. پر اردو ٻوليءَ ۾ سندس شاعريءَ جو تعداد وڌيڪ آهي. سنڌ جي نامياري محقق ڊاڪٽر نبي بخش خان بلوچ پنھنجي ڪتاب ’سنڌ مين اردو شاعري‘ (راز عھد شاھجھان تا قيامِ پاڪستان) ۾ سيد ڪليم ﷲ شاھہ راشديءَ جو ذڪر ڪندي ڄاڻايو آهي تہ 1904ع ۾ سندس اردو غزلن جو مجموعو ڇپيل آهي، جنهن مان اهو اندازو لڳائي سگهجي ٿو تہ سندس ٻيا بہ شعري مجموعا ڇپيا هوندا، جيڪي هن وقت اڻ لڀ آهن. سيد ڪليم ﷲ شاھہ جي شاعريءَ ۾ فن ۽ فڪر جو حسين سنگم نظر اچي ٿو. سندس شاعريءَ ۾ بي انتها گهرائي سمايل آهي، کيس راڳ ۽ ويراڳ سان بي انتها چاھہ هو. ان دؤر ۾ ننڍي کنڊ جا ڪيترائي گويا وٽس اچي راڳ رنگ جون محفلون ڄمائيندا هئا. سيد ڪليم ﷲ شاھہ جو هڪ قلمي نسخو ميرزا عباس علي بيگ وٽ حيدرآباد ۾ محفوظ پيل آهي. کيس سير و سياحت جو پڻ بيحد شوق هوندو هو. هيءُ هڪ ڀيري بمبئيءَ ويو، جتي سندس وفات ٿي.

شاعر - ڀاڱي جون ٻِيون داخلائون