رحمت الله لاشاري

رحمت الله لاشاري: سنڌ جو نامور ڪالم نگار، مضمون نگار ۽ سگهڙ مولوي رحمت الله ولد فقير شاهنواز لاشاريءَ جو جنم، 02 جنوري 1982ع ڌاري ڳوٺ حاجي مير محمد لاشاري، تعلقي ميهڙ، ضلعي دادوءَ ۾ ٿيو. ابتدائي تعليم ڳوٺ ٻنڊي، تعلقي ڏوڪريءَ مان ۽ مڊل موئن جي دڙي مان ڪيائين ۽ ديني تعليم درسگاهه الله آباد، ڪنڊياري مان پڙهيو. پيشوراڻي زندگيءَ جو آغاز هڪ مسجد ۾ پيش امام طور ڪيائين ۽ اڃا تائين پنهنجا فرض سرانجام ڏئي رهيو آهي ۽ گڏوگڏ سنڌي صحافت سان به لاڳاپيل آهي. سندس ڪالم ۽ مضمون جن جو تعداد ٻه سؤ کان به وڌيڪ آهي. سنڌ جي مختلف اخبارن ۾ آڪاش عاجز جي نالي سان ڇپجندا رهيا آهن. سگهڙائپ جي شروعات 1997ع ۾ سنڌ جي نامور سگهڙ استاد فقير محمد ملوڪ عباسيءَ سان ملاقات کان پوءِ ڪئي، جنهن کيس ريڊيو پاڪستان حيدرآباد تي متعارف ڪرايو، جتي هن تمام گهڻي مڃتا حاصل ڪئي. هن وقت تائين سندس آواز ۾ نعت خوانيءَ جون آڊيو ۽ وڊيو سي ڊيز رليز ٿيون. مارچ 2004ع ۾ قائم ٿيل سنڌ ۽ بلوچستان جي سگهڙن جي تنظيم ’سنڌ سگهڙ سنگت لوڪ ادب ويلفيئر تنظيم‘ (سلات) جي بانيڪارن مان آهي.
رحمت الله لاشاري سنڌ ۾ ٿيندڙ ثقافتي ۽ سگهڙن جي ڪچهرين ۾ شريڪ ٿي ڪيترن ئي پروگرامن ۽ سگهڙ ڪانفرنسن جي صدارت پڻ ڪندو آهي. کيس پنهنجي فن جي مڃتا طور ڪيترائي اوارڊ ۽ ٻيا انيڪ انعام پڻ ملي چڪا آهن، جن ۾ دولهه دريا خان اوارڊ (1998ع)، استاد محمد ملوڪ عباسي اوارڊ (2000ع)، سڄاڻ سگهڙ اوارڊ (2004ع) ۽ شهباز اوارڊ (2003ع) شامل آهن. سندس ڇپيل ڪتابن ۾: (1) رحمت جا خزانا، (2) رمزون رحمت الله جون، (3) مولود ۽ مداحون، (4) رنگ رحمت الله جا.
هن وقت ڄام شوري ۾ رهائش پذير آهي.

داخلا ۾ استعمال ٿيل تاريخون

1982.01.02  عيسوي

سنڌ جو نامور ڪالم نگار، مضمون نگار ۽ سگهڙ مولوي رحمت الله ولد فقير شاهنواز لاشاريءَ جو جنم، 02 جنوري 1982ع ڌاري ڳوٺ حاجي مير محمد لاشاري، تعلقي ميهڙ، ضلعي دادوءَ ۾ ٿيو.

سُگھڙ - ڀاڱي جون ٻِيون داخلائون